青衣大橋（Tsing Yi Bridge）係香港一條高架嘅跨海大橋，響正藍巴勒海峽上面，連住青衣島東岸山腰，同埋響葵涌醉酒灣填地附近青洲個山腰。條橋係島上面幾間大公司夾份起嘅，響1974年2月28日由港督麥理浩開幕。起好之後就交畀香港政府，由政府出錢起埋其餘嘅路。自從青衣北橋起好之後，條橋又多個名叫南橋。日常生活中，市民普遍將兩條橋合稱做南橋，而兩橋同時係葵青路嘅組成部份，只係行車方向唔同。

不過，青衣大橋同葵青橋並唔係同時通車。響葵青橋落成之前，青衣大橋一直都係雙程行車；直到1999年，葵青橋通車，青衣大橋就改為只往葵涌方向。

青衣大橋全長610米，離海面高度26米，有兩綫行車道同埋兩邊行人路。

青衣大橋嘅落成，係為咗配合荃灣新市鎮青衣部份嘅發展。1970年代起，青衣開始發展，而且響該島設置加工場嘅石油公司推動下，香港政府決定起青衣大橋。大橋響1974年2月28號落成啟用，耗資1700萬港幣。當時香港總督麥理浩爵士主持開幕儀式。

1987年，青荃橋（青衣北橋）落成，減輕當時青衣大橋（青衣南橋）長期塞車嘅情況。因為北橋落成，1989年2月到1990年4月，青衣大橋可以封閉做第一次維修，當時要間歇性全綫封閉。

之後響1999年12月到2000年7月期間，路政署趁青衣大橋並排嘅青衣複製橋落成，同青衣大橋做第二次維修，拉直橋面。之後青衣複製橋負責入青衣方向，而青衣大橋負責葵涌方向。

2007年6月15號，運輸署將青衣大橋嘅車速限制放寬到每小時70公里^[1]。

1. ↑ 〈政府憲報〉. 原著喺2007年9月27號歸檔. 喺2009年8月9號搵到.