《那夜凌晨，我坐上了旺角開往大埔的紅VAN》（粵拼：naa5 je6 ling4 san4 ngo5 co5 soeng6*5 liu5 wong6 gok3 hoi1 wong5 daai6 bou3 dik1 hung4 VAN；意思即係「嗰晚凌晨，我上咗旺角開去大埔嘅紅色小巴」；英文：The Midnight After），係一部由陳果執導嘅科幻片，改編自響香港高登討論區上面連載嘅同名小說，喺2014年4月10號上映，由黃又南、文詠珊、任達華、徐天佑、惠英紅同林雪等人演出。

呢部戲響2014年2月入圍第64屆德國柏林國際電影節「電影大觀」（Panorama）單元，係陳果繼《三更2之餃子》之後第二部擠身柏林電影節嘅作品，並喺電影節上映^[1]。

故事講述主角游梓池（阿池）響某天夜晚同朋友「唱K」之後，喺凌晨時份搭由九龍旺角開去新界大埔嘅紅色小巴（俗稱「紅van」）返屋企^[2]，架車經過獅子山隧道之後，主角發現車廂外面嘅世界、啲車同人都消失嗮，剩番小巴本身同車廂嘅17人，好似進入咗另外一個時空。故事發展出一連串的神秘事件，而乘客開始一個個無端端死咗，隨後又有戴防毒面具嘅神秘人出現；主角需要解開一切謎團，以重返原來嘅世界^[3]。

套戲嘅藍本原本係響香港高登討論區連載嘅同名網絡小說，由Mr. Pizza所著。隨住小說嘅連載，知名度不斷提高；響2012年中，有印刷商為小說製作印刷本。

2012年12月中，有報道話香港導演陳果有意開該小說嘅電影版本，令《紅VAN》成為繼胡耀輝執導嘅《一路向西》之後，第二部原本響討論區連載之後改篇做電影嘅香港網絡小說。陳果原本打算畀梁洛施出演女主角Yuki，之後換成由文詠珊出演，而佢亦都希望可以搵影帝級演員客串；及後確定男主角會由響《香港有個荷里活》演出嘅黃又南擔任，令電影同時包含香港多位影帝級同新生代演員^[4] 。與此同時，陳果表示電影會分開上下兩部，預計成本大約五千萬港元^[5]。

《紅VAN》電影預定響2014年2至3月上映。響香港上映之前，《紅VAN》入選第64屆德國柏林國際電影節嘅「電影大觀」（Panorama）單元^[6][7][8]，並會喺2014年2月電影節全球首映^[9]，電影喺香港嘅上映日期亦因而延遲^[10]。

響套戲入面，嗰架小巴係用真正嘅車嚟拍攝，無專登做一個場景^[11]。導演陳果話，拍小巴戲份嗰陣，要全程拖住嚟影，而且因為車本身嘅空間有限，容納十七位演員之外，又要有一班工作人員負責收音同打燈，另外扮演司機嘅演員林雪響現實生活中唔識揸車，因此認為最困難嘅拍攝地方係拍攝小巴嘅戲份^[11]。

套戲原定響2014年7月上映，之後因為預告片嘅點擊好多，所以決定提早^[12]響2、3月上映^[13]。響香港上映之前，《紅VAN》入選第64屆德國柏林國際電影節嘅「電影大觀」（Panorama）單元^[14][15][16]，又會響電影節全球首映^[17]，因此電影喺香港嘅上映日期要延後到4月^[13]。

原版因為有大量嘅粗口同埋有姦屍嘅情節，俾香港影視處評為三級片。為咗照顧未成年嘅觀眾，陳果推出咗一個IIB版嘅修改版本^[12]，將粗口剪輯到最少，亦都會將強姦戲打格仔^[18]。修改版本比原版長0.42分鐘^[19]。

套戲嘅結尾係大隊出發到大帽山，未有結局，導演陳果話要睇票房反應，先至決定拍唔拍續集^[18][20]。