道教係一個中國傳統宗教，意思即係話「道」嘅教化同說教，通過信奉「道」嘅精神修煉而成仙得道嘅宗教。道教根據早期道家哲學思想中關於道生萬物、氣化宇宙、天人合一嘅世界觀做基礎，發展咗一套關於陰陽互相轉化嘅思想出嚟，成為道教最基礎信仰。

多數認為道教成個體系，由先秦道家開始發展，之後受傳統鬼神崇拜同民間巫術影響，大約喺東漢嗰陣形成基本形態，跟住又吸收咗儒家嘅道德倫理觀、墨家嘅均平思想、陰陽家嘅占卜術數，再經歷唔同朝代思想演變，最後變成一套成熟同完整嘅宗教體系。

道教崇尚自然無為同佢嘅神仙信仰，對中國文化影響深遠，好多道教嘅崇拜活動，都同傳統中國人生活、文化活動有關連。另外，道教服藥煉丹方術同埋養生術，亦演變出中醫中藥嘅學問出嚟。

多數認為道教有三個源頭，第一係民間原始宗教崇拜，即係遠古時代一啲自然崇拜、巫術等。到春秋戰國嗰陣，興起方仙信仰，認為有啲仙藥或者秘術可以令人長生不死。方仙信仰亦係對道教影響最深遠一樣嘢。到咗西漢，受道家學說影響，興起咗黃老道，亦都係道教點解叫道教嘅原因，同時開始有組織起上嚟，道教亦正式成形。

到唐代可以話係道教最興盛嘅時候，唐代皇室甚至將太上老君當做祖先，唐玄宗甚至將道士當做皇族一樣，佢又將道家學派始創者老子封為道教教主，即太上老君，其他道家代表人物好似莊子就封為南華真人、列子封為沖虛真人、文子封為通玄真人、亢倉子封為洞靈真人。之後重發生唐武宗滅佛事件，唐武宗為咗扶持道教，下令拆佛寺同逼僧人還俗，可見道教當時幾巴閉。

到咗宋代，儒、釋、道多咗交流，《周易》成為列入道家經典，新興宗派都主張儒、釋、道三教結合。

一路到清朝，道教開始衰落，加上清朝統治者都係滿族人，佢哋本身信開藏傳佛教，同時又主張以儒學治國，令道教更加衰落。

到咗康熙嗰陣，全真龍門派王常月推行一啲教法改革，之後全真龍門派火速發展，令道教又振興返。但到咗文革，所有宗教都受到打擊，道教亦唔例外，於是道教去晒香港同台灣發展，直到1978年十一屆三中全會落實宗教自由政策，道教先又再喺中國大陸開始返。

道教經典，多數係指收入《道藏》嘅經典，不過亦有一啲唔係《道藏》嘅經典列入道教。根據《漢書》藝文志講，先秦道家同神仙著作至少47種，夾埋1198卷，重有其他涉及道教嘅計埋成四千卷，不過都失傳晒，而家剩返只有《老子》、《莊子》、《淮南子》、《墨子》、《孫子兵法》、《黃帝內經》，呢啲都列入《道藏》，成為道教經典。

除咗《道藏》之外，南北朝到隋唐亦有好多書畀道教列為經典，好似《老子化胡經》、《太平經》、《無上秘要》、《大道通玄要》、《葉淨能詩》等等。

• 道教（英文）
• 道教文化資料庫

呢篇道教係關於宗教嘅楔位文章，重未完成嘅。麻煩你幫手補充佢嘅內容。