諸民誼（1884年1月17號—1946年8月23號）係大清及中華民國人，係武術、革命人士，曾反清，歷任中國國民黨委員，同中華民國要職。第二次世界大戰時，幫汪精衞另起中華民國南京政府，親侵華嘅日本，同中華民國重慶政府作對，戰後因叛國而處死。

國立廣東大學^[1]，時稱廣大。鄒魯係首任^[2]校長，其下人稱鄒魯派。鄒在任其間，諸民誼係敎務長，所以同鄒魯派關係唔錯。之後陳公博接任，排除鄒魯派，又對付民權社學生，開夜班專修館，結果校內學抵制，一致告假，陳氏不得志而去。

廣州政府委任諸民誼接任。佢一上任就換走陳公博嘅人，重用鄒魯派。就算畀人查辦嘅會計主任趙靜山，都畀佢復職。咁就畀新派學生抗議。嗰陣，走咗嘅陳公博，寫信畀廣州政府主席汪精衞，篤佢背脊。汪氏去佢屋企，鬧佢一鑊。諸氏叫趙氏自行辭職。

陳公博係青年部長，四處拉攏人，搞學生會，爲青年部效力。民權社同市敎職員識破，趁開會嗰陣鬧事，結果搞唔成。諸氏知而不問，民權社派大出風頭。新學生派就勁嫉忌，故意挑剔諸氏。陳公博又周圍排斥諸民誼。諸民誼怕做咗共派眾矢之的，做咗幾個月校長後，喺一九二六年三月卅一號辭職。政府挽留，但新學生派話，諸民誼一日不去，一日不肯相安無事。