石湖墟遊樂場
石湖墟遊樂場（英文：Shek Wu Hui Playground）係位於香港新界上水石湖墟嘅一個公園，係上水最早建成公共休憩場所之一，早係1950年代尾石湖墟第二次重建後已經喺度。雖然歷嚟做過好多次翻新，不過佈局基本上都無改變，而家由康樂及文化事務署管理。[1]
設施
[編輯]遊樂場位於石湖墟內核心地段，周圍有唐樓包圍，鄰近上水公共交通總站同龍琛路商住區，地理位置便利。因此呢度係區內使用率最高嘅球場之一，亦有大量居民喺呢度休息，而來往龍琛路同符興街行人會避免經過人多車多嘅街道，都會選擇直接穿過石湖墟遊樂場入面嘅籃球場。
1970年代，電視廣播喺香港逐漸興起，但當時大多數市民未有經濟能力買電視機，政府曾經喺石湖墟遊樂場入面嘅兒童遊樂場擺放一部細電視機，畀附近居民免費睇電視節目，以前居民只可以係有電視機嘅涼茶鋪或電器店舖門前面睇電視。後來香港經濟起飛，市民收入增加，電視機變得普及後，遊樂場就無再擺放電視機。
自2010年前後，香港水貨活動越來越普及，鄰近香港同內地邊境嘅上水首當其衝，石湖墟遊樂場南面同北面都有大量商鋪改為服務水貨活動爲主嘅藥房同化妝品店，附近街道成日俾水貨客搞到水泄不通，經常有水貨客喺遊樂場入面休息或者用廁所，令到人流更多。[2][3]
而家石湖墟遊樂場足球場都會用作舉辦學界地區足球賽[4]同埋地區節慶活動[5]。
北區年宵市場
[編輯]每逢農曆新年前一星期，香港政府都會喺石湖墟遊樂場足球場同埋籃球場舉辦北區年宵市場（英文：North District Lunar New Year Fair），設置大約90個攤位，自從北區第一次舉辦年宵市場開始就喺石湖墟遊樂場舉行，到而家已經有幾十年歷史，一般嚟講足球場嗰邊係年花濕貨檔口，籃球場嗰邊以售賣賀年飾物同食品等乾貨爲主，雖然規模唔算大，但每年都會吸引大量區內居民入場選購應節貨品。[6]
設施
[編輯]設施有一個七人硬地足球場、一個籃球場、一個兒童遊樂場同埋一個公廁。
開放時間
[編輯]遊樂場每日24小時開放，無閘門。[7]
參考
[編輯]- ↑ 康樂及文化事務署：設施及場地
- ↑ Now新聞：《假期前上水再擠滿內地水貨客》，2014年12月17日。
- ↑ 〈蘋果日報：《【水貨圍城】侯志強巡場：要嚟嘅始終要嚟》，2016年3月8日。〉. 原著喺2017年11月7日歸檔. 喺2022年3月23日搵到.
- ↑ 〈東方日報：《學界女子七人足球聯賽 石湖墟遊樂場煞科》，2017年5月6日。〉. 原著喺2017年11月7日歸檔. 喺2022年3月23日搵到.
- ↑ 〈文匯報：《石湖墟商會嘉年華慶70周年》，2010年12月17日。〉. 原著喺2011年2月1日歸檔. 喺2022年3月23日搵到.
- ↑ 香港政府食物環境衞生署公告：《2018年農曆年宵市場攤位競投》
- ↑ 康樂及文化事務署：設施及場地
Text is available under the CC BY-SA 4.0 license; additional terms may apply.
Images, videos and audio are available under their respective licenses.
