白鱀豚
 | ||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
 白鱀豚嘅畫
 同人比大細
| ||||||||||||||||||||
| 物種分類 | ||||||||||||||||||||
| ||||||||||||||||||||
| Lipotes vexillifer Miller，1918年 | ||||||||||||||||||||
 白鱀豚以前嘅生活範圍
|
白鱀豚（又稱白鱀鯨、白鰭豚、白鱀、白旗、白鰭、白夾、江馬等；學名：Lipotes vexillifer）係一種淡水鯨類喙豚科動物，只係得中國長江流域先有，群種數量極小，估計唔夠50隻[1]，係世界上五種僅存嘅淡水豚類入面數量最少嘅一種，又叫做「水中大熊貓」，已經係中國國家一級野生保護動物。喺2006年12月嘅野外調查失敗之後，呢個物種被認為已經絕種，就算有任何個體仍然生存，數量亦維持唔到延續族群[2]。
早期歷史
[編輯]根據化石記載，白鰭豚喺兩千萬年前由太平洋遷徙到長江。兩千幾年前嘅中國古書《爾雅》入面，都有關於白鰭豚嘅記載。估計喺中國曾經有五千隻[3]咁多，重有一個長江女神嘅外號[4]。
分佈區域
[編輯]白鱀豚曾廣泛分佈喺長江流域，不過一直以嚟，受到人類活動影響，群種數量已經不斷減少，分佈區域亦逐漸縮細。
歷史上，白鰭豚曾廣泛存在喺長江流域嘅洞庭湖同鄱陽湖湖區，喺長江入面嘅分佈最遠去到三峽地區葛洲壩上游35千米度，就算去到上海附近嘅長江入海口都曾有發現。但係，到咗20世紀90年代，白鰭豚喺洞庭湖同鄱陽湖湖區已經絕跡，喺長江嘅分佈區上限都移到去葛洲壩下游170千米處嘅荊州附近，下限縮減更嚴重，到南京附近就連影都無，喺1997年到1999年嘅觀測入面，喺南京下游臨近江陰以下就再搵唔返。喺最近嘅幾次觀測，佢地嘅分佈主要只係喺長江流域洞庭湖到銅陵段，重點聚集喺3個區域：銅陵段、鄱陽湖同洪湖段。而最後一次發現白鰭豚係喺2004年長江南京段搵到嘅擱淺白鰭豚屍體。
身體特點
[編輯]白鰭豚身體呈流線型，身軀呈紡錘形，體態矯健優美，成年白鰭豚一般體長約2.5米，體重100至200千克，雌豚比雄豚細小。到2006年為止，已經發現最大隻嘅雌豚長253厘米，體重237千克，而已發現最大隻嘅雄豚體長216厘米，體重125千克。
白鰭豚皮膚光滑細膩，有一種特殊嘅彈性，原理同競賽式游泳衣著入面好有彈性嘅尼龍織料好似，可以減少喺水入面快速游動時身軀周圍產生嘅湍流。佢嘅尾鰭扁平地分為兩叉，兩邊嘅胸鰭呈扁平嘅手掌狀，背鰭呈三角形。呢四鰭令白鰭豚喺水入面游動嘅方向同控制平衡力特別耍家。再加上光滑高彈性嘅皮膚同流線型嘅身軀，令白鰭豚喺逃避危險嘅情況下可以游到每小時60千米咁快。就算平時亦可以游每小時10至15千米。
初生白鰭豚個身嘅顏色比較深，成年白鰭豚多數背面呈淺青灰色，腹面呈潔白色，如果有太陽照住會變得好光亮。水平伸展嘅鰭肢同尾鰭上下兩面都同背、腹同色，啱啱同環境顏色好似，如果你喺水面睇落去，佢背脊嘅青灰色同江水混撈埋一齊好難見到，而由水底睇返上去嘅話呢，白色嘅腹部同水面反射嘅強光顏色撈埋亦一樣好難睇到。所以白鰭豚喺逃避獵殺，或者接近獵物嗰陣，會好似隱咗形一樣。
因為白鰭豚長期生存喺長江嘅濁水入面，所以佢嘅視覺同聽覺都退化嗮。喺水入面唯有靠發射聲納接收信號嚟識別物體。如果用特製嘅水聽器，就可以聽到白鰭豚發出嘅「的答」「嘎嘎」咁十幾種唔同嘅聲。呢啲聲通常兩聲一對，出咗聲之後就會好靜咁等回音返嚟，然後靠回音嘅距離同音量大細去判斷環境情況。佢地就係用呢套獨特嘅聲納系統喺江底嘅淤泥入面搵食。佢地亦可以發出人耳聽唔到嘅高頻率音波，同十幾千米外嘅同伴聯繫。
平時白鰭豚會每隔10至30秒突出水面換氣一次，喺換氣嗰陣會發出「噗哧噗哧」咁嘅聲。
白鰭豚嘅大腦面積比海豚大。大腦嘅重量約占總體量嘅.5%。平均一隻重95千克嘅雄豚，大腦重470克，呢個重量已接近大猩猩同黑猩猩嘅大腦重量。所以有啲學者認為白鰭豚重聰明過黑猩猩同埋長臂猿。
生活習性
[編輯]白鰭豚天性好細膽，好容易嚇親，所以見到船都會走，種群數量又少，活動區域又廣，所以對白鰭豚喺野生狀態下嘅研究好有限。
佢地通常都鐘意群居，不過呢種群居特性就無同屬鯨目嘅海豚咁明顯，通常都係3、4隻群埋一齊，最多都係9到16隻，不過亦成日有啲白鰭豚鐘意單獨行動。白鰭豚最鐘意喺河流交匯處活動，尤其是河流沖積嘅淺灘區，成日都可以見到佢地同江豚一齊玩。同其他江豚一樣，白鰭豚多數喺日頭活動，尤其清晨同午後最活躍，隔10秒至30秒就見到幾隻白鰭豚排成一條線咁游出水面換氣。不過多數時間都係喺深水入面慢慢游。而喺夜晚，白鰭豚多數棲息喺深水嘅漩渦入面休息，有時會留喺同一地點5至6個鐘咁耐。
白鰭豚係食肉動物，多數食長江入面唔超過6.5厘米長嘅魚仔為主，直接吞唔使咬，而且食量好大，一日可以食到體重10%到12%嘢。
白鰭豚係哺乳動物，胎生，雌豚多數喺6歲達到性成熟，雄豚就4歲，成年白鰭豚每年發情兩次，分別喺3月至5月，8月至10月，孕期為10至11個月，一胎一仔，間唔中有兩隻生。喺野生狀態下，成年白鰭豚雌雄比例係1：1，但雌豚懷孕率一般得30％，自然繁殖率好低。
保護狀況
[編輯]1978年，中國科學院建立淡水海豚研究中心，作為武漢水生生物研究所嘅其中一部門。
1992年，白鰭豚成為中國第四屆大學生運動會嘅吉祥物，白鰭豚嘅保護亦越來越受到普通民眾關注。
1996年12月25日，中國第一個以水生動物為保護對象嘅基金會，武漢白鰭豚保護基金會正式成立，依家呢個基金會共募集資金138萬幾蚊，資金主要用喺白鰭豚呢種水生動物保護、研究工作。
IUCN保護狀況變更歷史
[編輯]- 1996年：極危（CR）
數量急降年表
[編輯]白鰭豚而家現存數量好難估計，但多數認為已經絕滅，就算有都只係得幾隻[5]。白鰭豚已成為鯨目動物中最瀕危嘅動物。
- 1979年：中國宣佈白鰭豚為瀕危物種
- 1983年：立法規定狩獵白鱀屬違法
- 1986年：剩返300隻
- 1990年：剩返200隻
- 1997年：少過50隻（發現23隻）
- 1998年：發現數量只剩返7隻
- 2006年：0隻[6]
瀕危原因
[編輯]白鰭豚數量逐年減少，除咗同佢本身繁殖能力較差外，最主要係因為受到人類活動影響。
由於圍湖造田減少湖泊面積，修壩隔住咗魚類喺江同湖之間洄游，長江入面好多具有半洄游性，喺江入面產卵，喺湖入面長大嘅魚類，好似草魚、青魚、鳙魚、白鰱咁嘅魚類都受到好嚴重嘅影響，亦係直接導致白鰭豚嘅食物資源減少，搞到生命面臨嚴重威脅。
呢幾年嚟，長江上面過度繁忙嘅水上運輸、河水嚴重污染同埋大量水利工程建設，都威脅住白鰭豚嘅生存環境，尤其係好多人類活動造成嘅噪音污染，對依靠聲納系統進行辨別定位嘅白鰭豚真係好大影響，好多白鰭豚都係葬身喺輪船嘅螺旋槳度。
重有就係人類捕捉亦係令白鱀豚瀕臨滅絕嘅主要原因。中國喺大躍進時期曾經設立過生產皮包嘅工廠，而佢地用嘅原料就係白鱀豚嘅皮[7]。就算1980年代之後嘅保護措施不斷加強，但係偷獵或誤獵嘅情況仍然成日發生，好多白鰭豚鬥唔過人類先進嘅捕撈設備，就咁死一隻就無一隻。
參考
[編輯]- ↑ 24歲的白鰭豚「淇淇」將服用保健品「安享晚年」，新華網，2002年7月10日
- ↑ The Baiji river dolphin is functionally extinct 互聯網檔案館嘅歸檔，歸檔日期2007年1月4號，.，baiji.org，2006年12月13日
- ↑ 長江三年未見活體白鰭豚 物種保護路難行[失咗效嘅鏈]
- ↑ 長江女神──白鰭豚 互聯網檔案館嘅歸檔，歸檔日期2007年4月30號，.，南方網，2005年7月21日
- ↑ 科學家：長江白鱀豚已基本滅絕，英國廣播公司中文網，2006年12月14日
- ↑ 白鰭豚可能已成為被人類滅絕的首種鯨類 互聯網檔案館嘅歸檔，歸檔日期2007年1月24號，.，新華網，2006年12月14日
- ↑ Last chance for China's dolphin，英國廣播公司，2006年6月27日
另見
[編輯]出面網頁
[編輯]
Text is available under the CC BY-SA 4.0 license; additional terms may apply.
Images, videos and audio are available under their respective licenses.
