熊貓
![]() | ||||||||||||||||||||||||||
---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
物種分類 | ||||||||||||||||||||||||||
| ||||||||||||||||||||||||||
Ailuropoda melanoleuca (David,1869年) | ||||||||||||||||||||||||||
![]() 熊貓出沒範圍
| ||||||||||||||||||||||||||
A. melanoleuca melanoleuca |
熊貓(Panda),又叫大熊貓(Giant panda)、貓熊,係中國嘅國寶級野生哺乳動物。同熊、貓一樣屬於食肉目。自從1869年一位法國傳教士第一次同熊貓改學名時叫做「黑白色嘅熊」之後,學名好快就俾人改咗。事實上科學界仍然有爭議熊貓嘅分類。
分布同產地
[編輯]熊貓可以話係活化石,因為佢個樣同幾十萬年前冇乜分別。古時熊貓產地遍及中國東部、南部,以至緬甸,但而家已經縮到四川省附近幾個山區。主要生活喺海拔 2000 至 3000 米嘅竹林同針葉林裏面。
食性同生態地位
[編輯]好多人都認為熊貓係主食竹葉嘅動物。其實熊貓又叫「食鐵獸」,只要佢一有機會,亦會捉竹鼠之類嘅小動物,過往亦都有食動物屍體,甚至會襲擊牲畜。而熊貓仔,亦係豹同亞洲豺犬嘅主要獵物。
保育現狀
[編輯]1936年1月,第一隻大熊貓被運到美國嘅舊金山,旋即引起「熊貓熱」,呢隻熊貓後嚟到咗芝加哥,喺1938年春天死咗。而喺佢死之前,布魯克動物園(Brookfield Zoo)已經以2500美元嘅代價取得一隻大熊貓。1972年,當時嘅美國總統尼克遜訪問中國,而當年中國將「新新」同「玲玲」送畀佢。1970-80年代,大熊貓都以租借嘅方式嚟到美國嘅動物園。飼養大熊貓可以為每間動物園平均花費每年260萬美元(重未包括熊貓BB在內),如果加多一隻BB,預算就突破300萬,如果2隻,費用就直逼400萬,比起其他瀕危物種嘅花費重更加多。
香港
[編輯]早喺1978年廣州動物園就曾經借出「寶玲」同「寶莉」嚟香港住4個月,之後喺1984年12月19號,福州市動物園亦借出熊貓「青青」同埋「濤濤」,喺香港住咗 5 個月。而現時來港定居嘅兩隻熊貓,「安安」同「佳佳」,就喺1999年5月18號送入香港海洋公園裏面住,耗資 8000 萬蚊起嘅「熊貓園」入面。但由於安安佳佳年事已高,更患上高血壓,中國中央政府決定再送兩隻熊貓:606(熊貓樂樂)、610(熊貓盈盈)畀香港,喺2007年4月26號嚟到。
台灣
[編輯]2005年4月,屬國民黨嘅連戰訪華期間,大陸宣布送一對大熊貓畀台灣,但要直到2008年,馬英九贏咗總統大選後,贈送大熊貓先有轉機。2008年12月23號,兩隻大熊貓「團團」同「圓圓」正式搬入台北市立動物園。佢哋生咗圓仔同埋圓寶。
瀕臨絕種嘅原因
[編輯]大熊貓生育率低,加上對生活環境嘅要求相當之高。要追溯大熊貓瀕危源頭可以由第一個發現嘅西方人愛德格神父(J. H. Edgar)開始。由於佢喺1916年第一次發現到大熊貓呢種古怪動物,之後吸引到大批西方人嚟中國射殺熊貓,捕捉生嘅熊貓亦成為佢哋嘅強烈慾望。直到抗日戰爭同中國內戰,外國人再無辦法喺中國繼續捕獵大熊貓,但大熊貓依然係當地人獲取肉同皮毛嘅對象。1949年以後人口增長令大熊貓嘅棲息地受到好大嘅壓力,之後嘅國民飢荒迫使佢哋獵取野生動物作為食物來源。文革期間,對大熊貓嘅所有研究同保護工作基本上都停晒。改革開放後,香港同日本嘅皮毛市場對熊貓皮嘅需求不斷膨脹,導致黑市偷獵熊貓皮嘅活動日漸猖獗,而應有嘅保護措施亦因為地方官僚作風而無法實行。
國家林業局於1998年實施全面禁止砍伐天然林同埋禁止個人擁有槍支,喺一定程度上保護咗大熊貓嘅生存。1992年之後,禁止移民入保護區,並安排居民陸續搬走,令大熊貓嘅棲息地得到一定嘅保證。經過多年嘅保護工作,有啲地方大熊貓嘅野外數量開始上升。
睇多啲
[編輯]- 《最後的貓熊》,ISBN 957-621-222-7
- 《新動物園:在荒野與城市中漂泊的現代方舟》,ISBN 957-8320-04-3
- 《國家地理雜誌》,2006年7月
出面網頁
[編輯]Text is available under the CC BY-SA 4.0 license; additional terms may apply.
Images, videos and audio are available under their respective licenses.