煎釀三寶
煎釀三寶係廣東、香港同埋澳門地區嘅常見街邊檔小食。呢種小食通常都係「十緡三件」,畀客人喺一堆煎釀小食入面揀三件。不過,呢三件通常以矮瓜、炸魚蛋、青椒同豆腐最受歡迎。
做法係將新鮮打嘅鯪魚肉釀喺切件嘅矮瓜、青椒、豆腐或者其他食物上面,再放喺鐵板上面煎香,魚肉面向下煎到金黃之後,再反轉煎熟就得,或者用油炸。食嘅時候用竹籤串住,再醮上豉油。間中重會有用鯪魚肉釀冬菇、釀紅腸、雲吞皮、腸仔、燈籠椒等。煎釀三寶用嘅鯪魚肉通常會先用紹興酒、油、糖、胡椒粉及麻油鹽醃15分鐘,之後會再加啲生粉,用嚟減低成本。
除咗將鯪魚肉釀喺其他食物外,重會用鯪魚肉炸成一個個圓圓、大大粒嘅魚蛋,但凍咗,魚蛋好似漏咗氣嘅氣球。
Text is available under the CC BY-SA 4.0 license; additional terms may apply.
Images, videos and audio are available under their respective licenses.