米高·法拉第（英文：Michael Faraday，1791年9月22號—1867年8月25號）係英國物理學家（當時對「物理」嘅稱呼為「自然哲學」），亦精於化學，喺電磁學同電化學領域有以下貢獻。

• 喺電學方面，法拉第研究負載直流電嘅導體同附近磁場之間嘅關係，喺物理學中建立起磁場呢個概念。佢發現咗電磁感應、抗磁性同電解。另外，佢亦發現磁場可以對光線產生影響，進而發現兩者間嘅基本關係。另外，法拉第重發明咗一種依電磁轉動嘅裝置，為電動機嘅前身。

• 喺化學方面，法拉第發現咗唔同嘅化學物質，如苯類。佢重發明咗一種加熱工具，係本生燈嘅前身。化學中嘅氧化數亦出自法拉第之手，另外如陽極、陰極、電極同離子呢啲而家電化學中成日用到嘅專有名詞，都係由法拉第推廣嘅。