歐洲聯賽冠軍盃

成立	1955年， 69年之前 (1955) （1992年改名）
地區	歐洲
主辦方	歐洲足協（UEFA）
參賽隊伍	32 隊（分組賽） 78 / 79 隊（總數）
晉級賽事	世界冠軍球會盃 歐洲超霸盃
相關賽事	歐霸盃（第二級） 歐洲協會聯賽（第三級）
現屆盟主	皇馬（第 15 次）
最成功球隊	皇家馬德里（15 次）
網站	歐聯網站
2024-25年歐洲聯賽冠軍盃

歐洲聯賽冠軍盃（UEFA Champions League），簡稱歐聯，係歐洲足球協會一年一度搞嘅足球賽，係歐洲足球會最高榮譽同埋水平，呢啲球會級賽事，不時譽為全世界質素最高，影響力最大，同埋水平最高嘅。佢亦係世界上，獎金最高嘅足球賽事，同埋體育賽事之一。估計每屆賽事，約莫有超過十億電視觀眾，經人造衞星轉播睇賽事。

首屆比賽，始於1955年到1956年度球季，當時叫歐洲冠軍球會盃（European Champion Clubs' Cup），簡稱歐冠盃（European Cup）^[1]，參賽球隊，只得歐洲足協所屬成員國嘅本土聯賽冠軍。1990年代，歐洲足協改革歐冠盃，首先係1991到1992賽季，賽事體制，分組循環及淘汰賽並用，唔再係傳統意義上嘅純盃賽。第二年，即1992到1993賽季，賽事亦因此改叫「歐洲聯賽冠軍盃」。之後到咗1997到1998賽季，首次跟歐洲足協系數排名，畀較強聯賽嘅第二名參賽，此後逐年放寬，家下英格蘭、西班牙等頂級聯賽頭四名，都有得打。

賽事主要分三階段，包括外圍賽、分組賽同埋淘汰賽。不過外圍賽嘅入波等成績，唔會計入神射手等獎項。

外圍賽一共分四輪，行主客淘汰制，2021/22球季開始取消作客入球優惠。外圍賽每支參賽球隊，係根歐洲足協嘅系數排名，按各隊實力高低，安排喺唔同階段嘅外圍賽。第一輪參加球隊，主要係實力最低嘅聯賽冠軍隊，好似法羅群島、哈薩克、盧森堡等。喺第二、三輪，就加入次級聯賽嘅冠軍，好似蘇格蘭、丹麥、瑞典等，而第三、四輪，就加入頂級聯賽嘅前列球隊，贏出嘅球隊，可以出線分組賽。

分組賽共有卅二隊參與。抽籤形式共分八組，每組各有四隊，之不過同一國嘅球隊，唔會編埋同一組。比賽行雙循環，每場贏有三分、和一分、輸零分，小組頭兩名晉級十六強。第三名轉戰歐霸盃，如果小組有兩隊或以上同分，就順次序根以下準則，定出勝方：

• 總體賽事，成績較佳嘅一方；
• 總體賽事，得失球較佳嘅一方；
• 總體賽事，多作客入球嘅一方；
• 小組賽事，總得失球較佳嘅一方；
• 小組賽事，總入球較多嘅一方；
• 根據歐洲足協嘅系數排名。

十六強、半準決賽八強、準決賽四強，都行主客制兩回合，2021/22球季開始取消作客入球優惠。

十六強由抽籤決定，對碰嘅球隊，會根據以下準則：

• 必須由小組首名對另一小組次名；
• 同一國嘅球隊，唔會對碰，但根據特別條款參賽嘅衛冕球隊除外；
• 首回合，喺小組次名球隊主場比賽先。

晉級八強嘅各隊，再抽對碰球隊，並同時決定八強到決賽嘅晉級表，呢次抽籤，冇任何小組名次、國別同主客場限制。

決賽喺中立球場進行，兩隊90分鐘打和會打加時，如果加時再和就互射十二碼決勝負。決賽贏出，就係當年賽季歐洲聯賽冠軍盃冠軍，可以參加同年嘅世界冠軍球會盃、歐洲超級盃，同埋下個賽季嘅歐聯。

歐洲聯賽冠軍盃嘅參賽名額，係按照歐洲足協所制定嘅一套計分法，計出歐洲各聯賽水平。佢以過去五年內，各聯賽球會喺各項國際或歐洲賽事上嘅表現，加指數計算，並以此分配名額。目前西甲、意甲、英超、德甲同埋法甲，呢類水準較高嘅聯賽，聯賽頭兩名可直接獲得參賽資格。西甲、意甲同埋英超三個聯賽嘅第三、四名，要打季初舉行嘅外圍賽，而德甲同埋法甲就只得第三名可以參加外圍賽（截至2009年）。而其他級別較低嘅聯賽，就只有一個直接參賽名額，甚至只有一個參加外圍賽嘅名額，而有啲新興足球國家嘅冠軍球隊，要靠喺要求較低嘅歐霸盃取得理想成績，提升指數，取得分配參賽席位嘅資格。

利物浦喺2005年第五度奪得冠軍，但佢喺英格蘭超級聯賽排第五，唔係聯賽頭四名，攞唔到來屆參賽資格，因此原則上佢冇得參加來屆賽事，事件引起好大關注，威爾斯聯賽冠軍TNS全網絡（全名Total Network Solution）曾經一度提議，以一場同利物浦嘅友誼賽，來換取參賽資格，結果威爾斯足總及歐洲足協反對。最後國際足協裁定，利物浦可以參加今屆賽事，但要喺外圍賽第一圈開始打，歐洲足協修改歐聯規例，若然以後再有呢類情況發生，即係國內聯賽，拎唔到歐聯參賽資格，如果衞冕冠軍嘅所屬國，除頭一到三3個參賽名額，衞冕冠軍嘅隊，可獲額外參賽名額，如果衞冕冠軍所屬國，有四個參賽名額，衞冕冠軍嘅，可獲參賽名額，但排第四嘅球隊，要轉戰歐洲足協盃/歐霸盃^[2]。不過利物浦把握唔到呢次機會，喺十六強畀賓菲加，以總局數三比零淘汰出局，衞冕失敗。

2007年11月30號歐洲足協決定喺2009/10年球季，引入新賽制，最大改變係外圍賽分兩部分，一個畀級別較低嘅聯賽冠軍角逐，另一個畀級別較高聯賽嘅非冠軍球隊角逐，另外，頂級聯賽，亦會多啲直接參加資格。

按照歐洲足協規定，每支參賽球隊必須喺截止前，報上參賽球員名單。呢份名單分兩部分，第一部分甲級球員，總數唔過廿五人，冇其它限制。第二部分，乙級球員無總人數限制，但要係22歲或以下，而且15歲以後，喺該球隊註冊效力已經超過兩個球季，目的鼓勵各球隊重視訓練青年。

每個球季，喺冬季轉會市場收市同時，各支已經獲得淘汰賽資格嘅球隊，可以報多球員三名，如果增報搞到甲級球員總數多過廿五人，就一定要撤銷已報名球員，以合乎規定。呢三名增報球員中，得一個人可以代表過其他球隊，參加過同一球季嘅歐洲足協盃/歐霸盃，而另外兩人，就一定要冇代表過其它隊伍，參加過同一球季嘅任何歐洲球會賽事 ^[3]。

決賽一般喺每年5月中舉行，決賽兩隊球隊喺中立場比賽，而中立場只可以係五星級球場（球場容量50000人以上）。參賽隊伍可獲得包括電視轉播權以及門票等多項收入。

目前奪得最多冠軍嘅係先後14次稱霸嘅西班牙勁旅皇家馬德里，頭五屆冠軍都係由呢間球會得到。

#	球會	所屬國家	奪冠次數	奪冠年份
1	皇家馬德里	西班牙	14次	1956年，1957年，1958年，1959年，1960年，1966年，1998年，2000年，2002年，2014年，2016年，2017年，2018年，2022年
2	AC米蘭	意大利	7次	1963年，1969年，1989年，1990年，1994年，2003年，2007年
=3	利物浦	英格蘭	6次	1977年，1978年，1981年，1984年，2005年，2019年
=3	拜仁慕尼黑	德國	6次	1974年，1975年，1976年，2001年，2013年，2020年
=5	巴塞隆拿	西班牙	5次	1992年，2006年，2009年，2011年，2015年
6	阿積士	荷蘭	4次	1971年，1972年，1973年，1995年
=7	曼聯	英格蘭	3次	1968年，1999年，2008年
=7	國際米蘭	意大利	3次	1964年，1965年，2010年
=9	賓菲加	葡萄牙	2次	1961年，1962年
=9	波圖	葡萄牙	2次	1987年，2004年
=9	祖雲達斯	意大利	2次	1985年，1996年
=9	諾定咸森林	英格蘭	2次	1979年，1980年
=9	車路士	英格蘭	2次	2012年，2021年
=14	漢堡	德國	1次	1983年
=14	多蒙特	德國	1次	1997年
=14	PSV燕豪芬	荷蘭	1次	1988年
=14	飛燕諾	荷蘭	1次	1970年
=14	阿士東維拉	英格蘭	1次	1982年
=14	些路迪	蘇格蘭	1次	1967年
=14	布加勒斯特星隊	羅馬尼亞	1次	1986年
=14	貝爾格萊德紅星	南斯拉夫	1次	1991年
=14	馬賽	法國	1次	1993年
=14	曼城	英格蘭	1次	2023年

#	國家	奪冠次數	晉身決賽次數	奪冠球隊
1	西班牙	19次	30次	皇家馬德里，巴塞隆拿
2	英格蘭	15次	26次	利物浦，曼聯，諾定咸森林，車路士，阿士東維拉，曼城
3	意大利	12次	29次	AC米蘭，國際米蘭，祖雲達斯
4	德國	8次	18次	拜仁慕尼黑，漢堡，多蒙特
5	荷蘭	6次	8次	阿積士，PSV燕豪芬，飛燕諾
6	葡萄牙	4次	9次	賓菲加，波圖
=7	法國	1次	7次	馬賽
=7	羅馬尼亞	1次	2次	布加勒斯特星隊
=7	蘇格蘭	1次	2次	些路迪
=7	南斯拉夫	1次	2次	貝爾格萊德紅星

賽季	冠軍	比數	亞軍	決賽地點
2022/23	曼城	1：0	國際米蘭	土耳其伊斯坦堡，阿塔圖克奧林匹克運動場
2021/22	皇家馬德里	1：0	利物浦	法國聖但尼，法蘭西運動場
2020/21	車路士	1：0	曼城	葡萄牙波圖，火龍球場
2019/20	拜仁慕尼黑	1：0	巴黎聖日耳門	葡萄牙里斯本，光明球場
2018/19	利物浦	2：0	熱刺	西班牙馬德里，大都會球場
2017/18	皇家馬德里	3：1	利物浦	烏克蘭基輔，奧林匹克國家綜合運動場
2016/17	皇家馬德里	4：1	祖雲達斯	威爾斯卡迪夫，千禧球場
2015/16	皇家馬德里	1：1 十二碼 5：3	馬德里體育會	意大利米蘭，聖西路球場
2014/15	巴塞隆拿	3：1	祖雲達斯	德國柏林，奧林匹克運動場
2013/14	皇家馬德里	1：1 加時 4：1	馬德里體育會	葡萄牙里斯本，賓菲加球場
2012/13	拜仁慕尼黑	2：1	多蒙特	英格蘭倫敦，溫布萊球場
2011/12	車路士	1：1 十二碼 4：3	拜仁慕尼黑	德國慕尼黑，安聯球場
2010/11	巴塞隆拿	3：1	曼聯	英格蘭倫敦，溫布萊球場
2009/10	國際米蘭	2：0	拜仁慕尼黑	西班牙馬德里，班拿貝球場
2008/09	巴塞隆拿	2：0	曼聯	意大利羅馬，羅馬奧林匹克球場
2007/08	曼聯	1：1 十二碼 6：5	車路士	俄羅斯莫斯科，盧赤尼奇球場
2006/07	AC米蘭	2：1	利物浦	希臘雅典，奧林匹克球場
2005/06	巴塞隆拿	2：1	阿仙奴	法國巴黎，法蘭西球場
2004/05	利物浦	3：3 十二碼 3：2	AC米蘭	土耳其伊斯坦堡，阿塔土克奧林匹克球場
2003/04	波圖	3：0	摩納哥	德國蓋爾森基興，奧夫沙爾克體育場
2002/03	AC米蘭	0：0 十二碼 3：2	祖雲達斯	英格蘭曼徹斯特，奧脫福球場
2001/02	皇家馬德里	2：1	利華古遜	蘇格蘭格拉斯哥，漢普頓公園球場
2000/01	拜仁慕尼黑	1：1 十二碼 5：4	華倫西亞	意大利米蘭，聖西路球場
1999/2000	皇家馬德里	3：0	華倫西亞	法國巴黎，法蘭西球場
1998/99	曼聯	2：1	拜仁慕尼黑	西班牙巴塞隆拿，魯營球場
1997/98	皇家馬德里	1：0	祖雲達斯	荷蘭阿姆斯特丹，阿姆斯特丹球場
1996/97	多蒙特	3：1	祖雲達斯	德國慕尼黑，奧林匹克球場
1995/96	祖雲達斯	1：1 十二碼 4：2	阿積士	意大利羅馬，羅馬奧林匹克球場
1994/95	阿積士	1：0	AC米蘭	奧地利維也納，恩斯特·哈佩爾球場
1993/94	AC米蘭	4：0	巴塞隆拿	雅典希臘，路易士球場
1992/93	馬賽	1：0	AC米蘭	德國慕尼黑，慕尼黑奧林匹克球場
1991/92	巴塞隆拿	1：0 加時	森多利亞	英格蘭倫敦，溫布萊球場
1990/91	貝爾格萊德紅星	0：0 十二碼 5：3	馬賽	意大利巴里，聖尼古拉球場
1989/90	AC米蘭	1：0	賓菲加	奧地利維也納，柏達球場
1988/89	AC米蘭	4：0	布格勒斯特星隊	西班牙巴塞隆拿，魯營球場
1987/88	PSV燕豪芬	0：0 十二碼 6：5	賓菲加	德國斯圖加特，內卡河體育場
1986/87	波圖	2：1	拜仁慕尼黑	奧地利維也納，柏達球場
1985/86	布加勒斯特星隊	0：0 十二碼 2：0	巴塞隆拿	西班牙西維爾，皮斯胡安球場
1984/85	祖雲達斯	1：0	利物浦	比利時布魯塞爾，希素球場
1983/84	利物浦	1：1 十二碼 4：2	羅馬	意大利羅馬，羅馬奧林匹克球場
1982/83	漢堡	1：0	祖雲達斯	希臘雅典，路易士球場
1981/82	阿士東維拉	1：0	拜仁慕尼黑	荷蘭鹿特丹，飛燕諾球場
1980/81	利物浦	1：0	皇家馬德里	法國巴黎，王子公園球場
1979/80	諾定咸森林	1：0	漢堡	西班牙馬德里，班拿貝球場
1978/79	諾定咸森林	1：0	馬模	德國慕尼黑，慕尼黑奧林匹克球場
1977/78	利物浦	1：0	布魯日	英格蘭倫敦，溫布萊球場
1976/77	利物浦	3：1	慕遜加柏	意大利羅馬，羅馬奧林匹克球場
1975/76	拜仁慕尼黑	1 : 0	聖伊天	蘇格蘭格拉斯哥，咸普頓公園
1974/75	拜仁慕尼黑	2：0	列斯聯	法國巴黎，王子公園球場
1973/74	拜仁慕尼黑	1：1 加時 重賽 4：0	馬德里體育會	比利時布魯塞爾，希素球場
1972/73	阿積士	1：0	祖雲達斯	南斯拉夫貝爾格萊德，貝爾格萊德紅星球場
1971/72	阿積士	2：0	國際米蘭	荷蘭鹿特丹，飛燕諾球場
1970/71	阿積士	2：0	彭拿典奈高斯	英格蘭倫敦，溫布萊球場
1969/70	飛燕諾	2：1 加時	些路迪	意大利米蘭，聖西路球場
1968/69	AC米蘭	4：1	阿積士	西班牙馬德里，班拿貝球場
1967/68	曼聯	4：1 加時	賓菲加	英格蘭倫敦，溫布萊球場
1966/67	些路迪	2：1	國際米蘭	葡萄牙里斯本，國家球場
1965/66	皇家馬德里	2：1	柏迪遜	比利時布魯塞爾，希素球場
1964/65	國際米蘭	1：0	賓菲加	意大利米蘭，聖西路球場
1963/64	國際米蘭	3：1	皇家馬德里	奧地利維也納，柏達球場
1962/63	AC米蘭	2：1	賓菲加	英格蘭倫敦，溫布萊球場
1961/62	賓菲加	5：3	皇家馬德里	荷蘭阿姆斯特丹，奧林匹克球場
1960/61	賓菲加	3：2	巴塞隆拿	瑞士伯恩，Wankdorf Stadium
1959/60	皇家馬德里	7：3	法蘭克福	蘇格蘭格拉斯哥，咸普頓公園
1958/59	皇家馬德里	2：0	蘭斯	德國斯圖加特，內卡河體育場
1957/58	皇家馬德里	3：2 加時	AC米蘭	比利時布魯塞爾，希素球場
1956/57	皇家馬德里	2：0	費倫天拿	西班牙馬德里，班拿貝球場
1955/56	皇家馬德里	4：3	蘭斯	法國巴黎，王子公園球場

• 入波
  • 第一個喺歐冠盃大演帽子戲法嘅球員係喺1955年9月7號效力Budapesti Voros Lobogo（即現時MTK布達佩斯）嘅彼得·帕羅塔斯（Péter Palotás）所創下，當時喺對比利時嘅安德列治個人連入三球協助球隊以6比3擊敗對手。[1]
  • 歐聯最快入波由效力拜仁慕尼黑嘅荷蘭前鋒馬卡爾所創下，佢喺2007年3月7號一場十六強次回合對皇家馬德里中以10.2秒射入。

• 球員及領隊
  • 前皇家馬德里隊長真圖（Francisco Gento）係目前奪得最多歐冠盃冠軍獎盃嘅球員，先後於1956年至1960年及1969年效力皇家馬德里時六次奪得冠軍。
  • 前皇家馬德里隊長真圖以及前AC米蘭隊長馬甸尼係目前晉身歐聯/歐冠盃決賽次數最多球員，佢哋先後帶領所屬球隊合共八次晉身決賽階段。
  • 施薩馬甸尼同佢個仔馬甸尼係目前係唯一一對父子同時以隊長身份奪得歐冠盃/歐聯冠軍。施薩馬甸尼喺1962至63年帶領AC米蘭奪冠，40年後嘅2002至03年馬甸尼再一次帶領AC米蘭奪得冠軍，咁啱呢兩場決賽都喺英國舉行，前者為倫敦，後者為曼徹斯特。
  • 鮑勃·佩斯利曾經喺1977年、1978年及1981年帶領英格蘭嘅利物浦三奪歐冠盃，係至今唯一三奪冠軍獎盃嘅領隊。
  • 荷蘭中場施多夫係第一位先後效力三間球會奪得四次歐冠盃冠軍，包括1995年嘅阿積士、1998年嘅皇家馬德里以及2003年、2007年嘅AC米蘭。
  • 安察洛堤係帶領球隊晉身歐聯決賽最多嘅領隊，2003年、2005年及2007年帶領意大利嘅AC米蘭，2014年及2022年帶領西班牙嘅皇家馬德里殺入決賽，2003年、2007年、2014年及2022年奪冠。
  • 2005年至2006年嘅利物浦成為首支球隊參加過全部三圈外圍賽而晉級淘汰賽階段嘅球隊（由1999年至2000年球季開始）。
  • 拉素門將巴路達喺2007年12月11號對皇家馬德里，以43歲253日成為歐聯最老嘅上陣球員。
  • 巴塞隆拿領隊哥迪奧拿喺2009年賽季成為史上第一位初次帶隊參加就奪冠嘅領隊，同時亦係史上最年輕（38歲）即帶隊奪冠嘅領隊。
  • 有七位分別以球員同埋主帥身份奪得歐冠，分別係穆諾茲（1956、1957年以皇馬球員身分奪冠，1960、1966年以皇馬主帥身分奪冠），查柏東尼（1963、1969年以AC米蘭球員身分奪冠，1985年以祖雲達斯主帥身分奪冠），克魯伊夫（1971、1972、1973年以阿積士球員身分奪冠，1992年以巴塞隆拿主帥身分奪冠），安察洛堤（1989、1990年以AC米蘭球員身分奪冠，2003、2007年以AC米蘭主帥身分奪冠、2014年以皇馬主帥身分奪冠），列卡特（1989、1990年以AC米蘭球員身分奪冠，1995年以阿積士球員身分奪冠，2006年以巴塞隆拿主帥身分奪冠），哥迪奧拿（1992年以巴塞隆拿球員身分奪冠，2009、2011年以巴塞隆拿主帥身分奪冠）同施丹（2002年以皇馬球員身分奪冠，2016、2017、2018年以皇馬主帥身分奪冠）。

• 球隊
  • 1999年嘅曼聯係歷史上首支以非本土聯賽冠軍或衛冕冠軍身份參加賽事而奪得冠軍嘅球隊，1998年曼聯喺英格蘭超級聯賽以聯賽亞軍身份參加翌年嘅歐聯賽事。
  • 曼聯曾經創下25場歐聯最長不敗紀錄，佢自2007至08球季開始保持不敗，直至2008至09球季決賽俾巴塞隆拿擊敗。
  • 皇家馬德里喺1997/98年至2017/18年賽季創出連續21年嘅最長連續參加歐冠盃/歐聯紀錄。
  • 阿士東維拉係歷屆歐冠盃/歐聯冠軍隊伍當中本土聯賽成績最差球隊，佢喺1981至82年賽季一比零擊敗拜仁慕尼黑奪得歐冠盃冠軍，但另一方面喺英甲聯賽只得第十一名。
  • 諾定咸森林曾取得連續兩個歐洲冠軍，但只獲得一次英格蘭聯賽冠軍，係至今唯一一支歐洲冠軍數量超過國內冠軍數量嘅球隊。而且，佢亦係第一支降落國內第三級別聯賽嘅前歐洲冠軍。
  • 阿仙奴喺2005至06年賽季創下連續10場嘅最長不失球紀錄，直至決賽階段俾巴塞隆拿嘅伊度奧終止995分鐘不失球紀錄。
  • 拜仁慕尼黑目前保持最長主場連勝紀錄（16場，2014年9月—2017年2月）。
  • 截止2008至09年賽季共有九支隊伍以不敗成績奪得冠軍，包括AC米蘭（1988/89及1993/94）、國際米蘭（1963/64）、阿積士（1971/72及1994/95）、諾定咸森林（1978/79）、利物浦（1980/81及1983/84）、馬賽（1992/93）、貝爾格萊德紅星（1990/91）、曼聯（1998/99及2007/08）及巴塞隆拿（2005/06）。
  • 為表揚隊伍喺歐聯有非常出色嘅表現，歐洲足協會會頒發一個榮譽徽章畀得獎隊伍，代表有關隊伍可以永久擁有冠軍獎盃，波衫亦會加上榮譽臂章；歐洲足協會重新訂造獎盃。獲獎條件必須係五次奪得冠軍或連續三次奪得冠軍，目前只有五支球隊能夠達成該目標：
    • 五次奪得冠軍
      • 皇家馬德里（13次奪得歐冠盃/歐聯冠軍）
      • AC米蘭（7次奪得歐冠盃/歐聯冠軍）
      • 利物浦（5次奪得歐冠盃/歐聯冠軍）
    • 連續三次奪得冠軍
      • 皇家馬德里（1956年至1960年連續5年奪得歐冠盃冠軍、2016年至2018年連續3年奪得歐聯冠軍）
      • 阿積士（1971年至1973年連續3年奪得歐冠盃冠軍）
      • 拜仁慕尼黑（1974年至1976年連續3年奪得歐冠盃冠軍）
• 目前只有利物浦（1976年及1977年）及波圖（2003年及2004年）能夠連續兩年先後奪得歐洲足協盃及歐冠盃/歐聯冠軍。
• 歷史上歐冠盃及歐聯曾經出現過9次同市打比，包括：
  • 1958-59年：皇家馬德里 對 馬德里體育會（準決賽，同屬西班牙馬德里球隊）
  • 2002-03年：國際米蘭 對 AC米蘭（準決賽，同屬意大利米蘭球隊）
  • 2003-04年：車路士 對 阿仙奴（半準決賽，同屬英國倫敦球隊）
  • 2004-05年：國際米蘭 對 AC米蘭（半準決賽，同屬意大利米蘭球隊）
  • 2013-14年：皇家馬德里 對 馬德里體育會（決賽，同屬西班牙馬德里球隊）
  • 2014-15年：皇家馬德里 對 馬德里體育會（半準決賽，同屬西班牙馬德里球隊）
  • 2015-16年：皇家馬德里 對 馬德里體育會決賽，（同屬西班牙馬德里球隊）
  • 2016-17年：皇家馬德里 對 馬德里體育會（準決賽，同屬西班牙馬德里球隊）
  • 2022-23年：國際米蘭 對 AC米蘭（準決賽，同屬意大利米蘭球隊）

1. ↑ 呢個亦係目前盃賽獎盃嘅正式名。
2. ↑ 《歐洲聯賽冠軍盃規章》第一章1.03條
3. ↑ "Winter's window of opportunity". UEFA. 喺2009-02-05搵到.
4. ↑ 【歐聯】香港歐聯轉播權歷史回顧 記得睇「泰星」的日子嗎？，香港01，2018-08-30

• 歐霸盃
• 歐洲協會聯賽
• 歐洲足協盃
• 歐洲盃賽冠軍盃
• 歐洲足球會獎

維基同享有多媒體嘅嘢：
歐洲聯賽冠軍盃

• 歐洲聯賽冠軍盃規章（英文）
• 國際足球歷史及統計協會（IFFHS）（英文）
• 歐洲各國聯賽近五年成績排名（英文）