協天宮古廟喺香港新界大埔區白石角客家原居民鄉村樟樹灘村，由姓溫嘅始祖起，日期不詳，協天宮係樟樹灘村各個姓氏嘅共同建築物，喺村公所出現之前，係全村（包括已分拆獨立嘅大埔尾村）嘅最高權力組織。喺1981年被評為香港二級歷史建築，但喺2010年1月22號改評為香港三級歷史建築。

協天宮初時係小型廟宇，之後因為香火鼎盛，喺清朝光緒廿四年（1898年）擴充，並以刻石記錄呢件事，之後喺宣統三年（1911年）同1997年重修。聽聞因為風水嘅原故，協天宮採用面向馬鞍山嘅設計。協天宮除咗供奉關聖帝君外，重有關平太子、周倉大將、太歲爺爺同福德公公等。

早期廟裏面有四副木刻對聯，其一：「義氣翠桃園兄弟三人三顧勤勞垂簡冊，精忠扶漢室君臣一德一生功業炳乾坤。」、其二：「伐吳魏以興劉耿耿丹心昭日月，封侯王而至帝巍巍大德配乾坤。」、其三：「義膽忠肝龍虎相從兄及弟，單刀匹馬華夷共仰古猶今。」其四：「千秋大義無雙士，萬古精忠第一人。」，但四副木刻嘅對聯都喺日治時期燒咗。

喺戰前，為咗向關帝表示崇敬，樟樹灘村同大埔尾村五姓村民定喺每年嘅農曆五月十三日關帝誕，例必搭棚上演四日五夜嘅粵劇神功戲，酬謝神恩同祈求來年順境。開台嘅第一日先抬出關帝神像去到戲棚前嘅神棚安奉，並打鑼十三響以表恭敬。

廟旁邊有一間已停辦、叫「樹人學校」嘅鄉村小學，喺1938年開辦，初時曾經借畀協天官做校舍。

• 邱東 著，《新界風物與民情》，三聯書店，1992年，ISBN 962-04-0970-1

• 大埔樟樹灘協天宮