李方桂
李方桂
出世	1902年8月20號 大清廣州
死	1987年8月21號 美國加州聖馬刁
國籍	中華民國 美國
職業	語言學者
活躍時期	20世紀

李方桂（粵拼：lei5 fong1 gwai3；1902年8月20號—1987年8月21號），廣州人，原籍山西昔陽縣。佢係喺中華民國同美國搞研究嘅語言學者，佢對美國印第安語言、漢藏語系語言、壯侗語系語言嘅研究留低好大嘅足跡。單係佢作爲中國語言嘅研究者，就爲語言學本身嘅發展做出好大貢獻，同趙元任譽爲中國語言學雙璧。

佢阿爺同老竇一門兩代進士及第，老母舊底做過慈禧太后嘅代筆女官^[1]。

李方桂喺廣州出世。1924年從清華大學畢業後，去咗美國留學。兩年後嘅1926年喺密芝根大學畢業，遞年做咗芝加哥大學嘅碩士，喺1929年^[2]獲得同間大學嘅博士學位，好猛噉取得學位。喺芝加哥大學佢跟住愛德華·薩丕爾、李奧拿德·布隆菲德、卡·打令·伯（英文：Carl Darling Buck）學嘢，搞美國印第安語言嘅調查。

1929年佢返中國，做咗中央研究院歷史語言研究所嘅研究員，一開始調查海南島嘅語言，之後研究中心轉移去中文以外嘅語言調查，開始對廣西嘅壯侗語系語言做學術調查。

1937年到1939年間佢去咗美國，做耶魯大學嘅客座教授，之後返中國，喺貴州、四川、雲南等地搞田野工作。

1946年到1949年間佢再次去美國哈佛大學、耶魯大學做客座教授。中華人民共和國成立時，佢放棄咗歸國，留咗喺美國，1949年到1969年間喺華盛頓大學^[3]、1969年到1974年間喺夏威夷大學做教授。嗰陣間佢去臺灣調查邵話同阿美話。

1987年李方桂喺加州聖馬刁首府紅木城過身。

李方桂一生著書9冊，寫咗超過100篇論文。

1927年佢跟隨薩丕爾（英文：Edward_Sapir）到加州北部研究當地講嘅阿薩巴斯卡語支嘅密滔利話（英文：Mattole language），接觸到絕代嘅兩個密滔利印第安人，結果寫出咗《密滔利：阿薩巴斯卡語言》（Mattole: An Athabaskan Language；1930年，呢篇博士論文後來出咗書），作爲佢研究咗美國印第安語言嘅印記^[4]。之後密滔利話變成死語，李方桂嘅記錄成爲知曉呢門語言嘅唯一線索。其他嘅佢仲調查咗加州嘅懷拉奇話（英文：Wailaki language）、加拿大北部嘅哈利話（英文：Slavey language）（Hare）、阿拉斯加嘅伊也厄話（Eyak）。

1930年代以後搞壯侗語言調查，得出結果有《龍州土語》（1940年）、《莫話記略》（1947年）、《武鳴土語》（1956年）、《水話研究》（1977年）等著作。

1977年嘅《壯泰語比較手冊》（A handbook of comparative Tai）係部構築壯泰祖語形態嘅著作。

1937年《中文年鑑》（The Chinese Year Book）中嘅文章《中國嘅語言同方言》（Languages and dialects of China）所示嘅漢藏語系嘅分類對後世影響好大。

喺中文歷史研究方面，喺1930年代時，佢同趙元任、羅常培一齊，將高本漢《Études sur la phonologie chinoise》（中文音韻研究）翻譯成中文，另外佢又發表《切韻â的來源》（1931年），之後佢就陸續發表有關上古音嘅研究。《Some Old Chinese Loan Words in the Tai Languages》（壯泰語中嘅上古漢語借詞；1945年）唔到10頁，卻係劃時代嘅論文，佢利用咗壯泰諸語表示十二支嘅詞，來推定上古音，呢啲詞係佢哋從中文借來嘅好古老嘅借用語。有關上古音研究嘅代表作係1971年嘅《上古音研究》，佢再構咗高本漢體系爲代表嘅上古音，後者有諸多問題，譬喻元音體系、音節頭嘅複輔音等，直到1990年代出現新研究之前，啲人都係利用李方桂嘅體系。

臺灣嘅清華大學出版社出版咗全13卷嘅《李方桂全集》。

• 香港中文大學榮譽法學博士（1976年）^[5]

• 李方桂 (1988年). 〈Linguistics East and West: American Indian, Sino-Tibetan, and Thai（東西語言學：美國印第安、漢藏、泰）〉. 《加州大學班歌羅夫特圖書館（Bancroft Library）》. 喺2017年9月19號搵到.
• LaPolla, R. J.（拉波拉.R.J.）. "Li Fang-Kuei (1902-1989)". 《語言及語言學百科全書（第二版）》. 倫敦: Elsevier. p. 153～154.