朱古仔
朱古仔[1]係香港一個已經冇咗嘅木屋區，位置相當於今日香港城市大學、又一城、又一居同又一村花園嘅範圍。
喺八十年代之前達之路只係去到海棠路為止，又一居嘅位置喺當時係一個山窩，山窩裏面同外面嘅山坡上面都搭咗唔少木屋，而喺九廣鐵路（港鐵東鐵綫）嗰一邊，即今日又一村花園嘅位有唔少菜田，山窩嘅出口喺瑪利諾神父教會學校後面，因為喺大坑東第二號遊樂場中間曾經有一條明渠[2]，由馬利諾神父教會學校同又一居第二十六之間流出，以前南山邨嘅居民要去又一村，就要喺呢條明渠則邊入去朱牯仔，去到海棠路嘅海棠苑後面，轉左就可以去到達之路，轉右就可以去到玫瑰路。
喺桃源街遊樂場以前係一片菜田，嗰道有一條明渠流入去信義會中英文幼稚園前面嘅馬路，之後就再流入喺大坑東第二號遊樂場嗰條明渠，而桃源街只係去到香島中學門口為止，菜田就係喺桃源街同明渠之間，喺信義會中英文幼稚園則邊有一條小路，沿住呢條明渠一直走，經過菜田後，明渠同小路就穿過一條又高又黑嘅峽谷，呢個峽谷就係喺依家達之路下面，走出峽谷後，再直行橫過鐵路，就可以去到九龍塘，而條明渠就係沿住鐵路，由筆架山流落嚟。
朱牯仔最先被清拆嘅部份係今日香港城市大學教學樓第一期嘅範圍，大概喺七十年代初期，因為嗰個範圍被用作興建地鐵觀塘線嘅工地，當觀塘線起好後就一直空置，嗰道曾經有一間大同中學。到咗七十年代尾，今日香港城市大學教學樓第二期，即教學樓紫區嘅範圍，又拆埋。無綫電視劇神劍魔刀（1986）部份外影喺呢道拍攝，不過套劇未拍完，香港城市大學就開始起。
到咗八十年代初，今日又一村花園同桃源街遊樂場嘅範圍就拆咗，大坑都唔見埋，達之路就伸延到今日生產力大樓嘅位置。
朱古仔喺1985年火燭過，災場範圍大概係馬利諾神父教會學校後面嘅山窩，場火大概喺入黑後起，火勢好猛，重係咁爆石油氣，最後摧毀咗成條木屋區，得番向住香島中學嗰邊山坡嘅幾間木屋；至於啲受影響嘅居民，就搬咗入山景邨、富善邨同祥華邨。到咗九十年代初，成個山窩俾人剷平，起咗又一居。
註
[編輯]出面網頁
[編輯]Text is available under the CC BY-SA 4.0 license; additional terms may apply.
Images, videos and audio are available under their respective licenses.
