少新權（1904年—1966年3月22號），原名陳利權，係香港嘅粵劇同電影演員。由於佢鍾意赤膊，被粵劇行嘅人叫做「豬肉佬」^[1]。

少新權喺清朝上海縣張家店出世，7歲父母雙亡，9歲由上海南下廣州，寄住喺阿叔屋企，並喺廣州河南大基頭嘅「梁本生醫館」做後生。10歲拜男花旦周錦波（細旺）為師學粵劇，被師母粵劇艷旦銀老鼠（陶三姑）安排入「超群樂」（兒童粵劇戲班）做「三步針」，正式參加粵劇商業性演出；21歲應聘一個人去到美國舊金山，同蘇州麗、黃侶俠、衛少芳同西麗霞等人一齊演出，被觀眾致送最重嘅金牌，三年半後返中華民國，就得到「金牌小武」嘅美譽。佢最後一次舞臺演出喺南越首都西貢，為「大龍鳳劇團」演出^[2]。

少新權亦係電影明星，從銀幕處男作《火燒阿房宮》（1952年，飾演秦始皇）到電影遺作《倚天屠龍記三集》（1965年，飾演空智禪師），一生演出約200齣電影。

1964年7月6號，喺九龍油麻地志和街嘅「百老匯酒店」（而家嘅「聖地牙哥酒店新館」）502號房，少新權同其它梨園子弟鄧偉凡、何驚凡、蕭仲坤、林蛟、蘇少棠、陳錦棠、白龍珠同埋羅家權等組成長期性嘅「先生俱樂部」，性質係聯絡感情同守望相助，談古說今，研究傳統藝術同埋打蔴雀^[3]。

1965年12月27號入咗伊利沙伯醫院留醫，到1966年1月6號轉到九龍醫院。3月22號凌晨3點，喺九龍醫院因高血壓症病逝，享年62歲^[4]3月23號下晝3時，喺九龍殯儀館舉殯，遺體葬九龍長沙灣天主教墳場^[5]。

佢留低老婆同兩仔一女：

• 大仔：陳兆祥（13歲，嗰時讀緊新法小學六年級）
• 女：陳婉冰（11歲，嗰時讀緊真光小學）
• 細仔：陳兆昌（7歲，嗰時讀緊聖方濟各小學）

1. ↑ 1977年6月10號，香港《華僑日報》，第七張，第二頁。
2. ↑ 1966年3月23號，香港《華僑日報》，第六張，第一頁。
3. ↑ 1964年7月7號，香港《華僑日報》，第六張，第二頁。
4. ↑ 1966年3月23號，香港《華僑日報》，第六張，第一頁。
5. ↑ 1966年3月24號，香港《華僑日報》，第六張，第一頁。

• 少新權嘅馳馬演出片段