報販霞姐被殺案係香港一單謀殺案。1999年9月22號清晨，喺香港深水埗，女報販何慧霞（霞姐）因為代表區內報販向《東方日報》嘅發行商拒絕強行增加訂紙，俾三名兇徒亂刀斬死。案發後，刀手三人同發行商兩人先後被判終身監禁。

1999年，東方報業集團正促銷旗下報章《東方日報》及《太陽報》，要求報販增加訂購報紙嘅數目，但惹來何惠霞等長沙灣、深水埗區報販不滿，拒絕要求，為此何惠霞同《東方日報》區域發行商青匯書報社有限公司蔡偉強商討「退回賣剩報紙」機制。

根據《明報》及《蘋果日報》2006年12月嘅報導，死者丈夫劉炳新憶述事件，「以前我哋報販每日要幾多數量就打畀青匯，青匯平時第二日就會送……今次青匯有個負責人向我太太講，因為《東方日報》要促銷，所以本身訂100份要收多50份，而多出嘅50份都要畀錢，畀足150份。」劉又指出，無論最終額外加嘅報紙賣唔賣得出，發行商都唔會回收。佢於是應老婆要求致電《東方日報》，對方負責人話會將事件記錄落來，不過劉之後並無收到《東方日報》嘅電話。劉表示，由於發生呢次無理加紙事件，深水埗區報販成立咗「報販零售業工會」，老婆喺工會做司庫。

案發前10日，即係1999年9月12號，劉氏夫婦及其他報販首次同青匯代表，商討訂紙嘅新制度，但會面並無成果。霞姐喺3日後同區內報販會面，一致反對青匯無理加紙，並安排由霞姐向青匯以及《東方日報》總發行商「青揚」表達有關報販嘅不滿。^[1][2]

根據《蘋果日報》喺2006年12月28號嘅法庭報導，法庭上控方證人嘅口供指出，1999年9月22號清晨大約5點15分，酒樓看更致電死者丈夫劉炳新，劉即刻趕去報紙檔，「我見到我太太坐喺樓梯，滿身鮮血，地下好多血，有個差人正為佢急救……然後我撲向我老婆嗰度，要差人快啲叫救護車。」

本案由於其中一名共犯連宗偉喺中國大陸販毒落網被判死緩，因此供出同謀而破案^[3]。

4名被告喺警誡之下都承認涉案^[4]。首被告盧漢興話，受《東方日報》區域發行商青匯書報社有限公司負責人蔡偉強指使「教訓」霞姐，第二被告李祖明及第三被告林自力都聲稱只負責睇水，而第四被告梁志鴻就負責施襲，另有一名男子連宗偉負責揸車。蔡偉強試過俾警方拘捕，但因證據不足而撤銷控罪。

2007年3月22號中午，六男一女組成嘅陪審團開始退庭商議，至到3月25號下晝5點15分，陪審團一致裁定盧漢興、李祖名、梁志鴻謀殺罪名成立，26號被判處終身監禁，林自力誤殺罪名成立判處監禁12年^[5][6]。主審法官包鍾倩薇指出，佢哋背後必定另有主腦，要求佢哋供出，或有機會獲得減刑或假釋。2010年6月，警方根據被定罪刀手等人嘅口供，拘捕兩名涉嫌主腦吳錫基及蔡偉強，2011年11月喺高等法院提堂^[7]。2012年5月30號，兩名被告吳錫基及蔡偉強謀殺罪名成立，喺高等法院俾法官貝珊判以終身監禁^[8]。

2007年3月27號，多份報章都以頭版大篇幅報道判刑嘅消息，不過，東方日報同太陽報就完全冇報道呢單新聞。而喺2012年5月31號，多份報章都有報道主腦判刑嘅消息，呢次包括東方日報同太陽報。