哥倫布日（Columbus Day）係美洲一個節日，用意紀念西班牙贊助嘅航海家哥倫布去到美洲，即係歐洲叫嘅新大陸。唔同國有唔同日子同叫法。個節日喺18世紀有民間慶祝，到20世紀就開始有地方訂做法定假期。

美國將呢日定喺10月第二個禮拜一。

雖然基斯杜化·哥倫布為歐洲打開咗殖民主義同埋發展美洲嘅大門，但對當地嘅美洲原居民印第安人來講，就係受到歐洲殖民者侵略嘅開始，從此大量美洲嘅原住民人口大幅下跌，歐洲殖民者佔領美洲土地，對於美洲嚟講係一個悲傷嘅日子，因為佢哋嘅生活從此被徹底改變：疾病、冇晒土地、打仗，唔單止令大量印第安人瓜老襯，更加令佢哋冇辦法自力更生，成為美國社會嘅最低層，甚至畀人當冇到。所以每年去到呢一日，好多印第安人都會舉行活動抗議殖民統治，重响哥倫布日嘅巡遊慶祝活動入面示威。

21世紀初，因為反對種族主義同埋轉型正義嘅聲音高漲，好多美國城市唔再紀念哥倫布日，改為慶祝原住民日，紀念原住民對美洲嘅貢獻。佐治弗萊案引發嘅推倒銅像運動入面，大大提高咗呢個爭議。