元朗明渠係明渠，喺香港元朗市中心，貫穿元朗郊區（大棠、元朗南）、元朗市（元朗大馬路、朗屏同工業邨）、同埋大生圍，由南向北，下游接山貝河，再流入后海灣。元朗明渠設計又闊又深，多年嚟為元朗市同郊區排走雨水。

明渠嘅水一向污糟，加上近年渠務改善工程疏導雨水，明渠大部份時間流量甚低，夾雜污泥同其他污染物，水質混濁。同埋早年有啲鋪頭食肆將污水渠駁入明渠，搞到條渠成日有垃圾同上游家禽嘅排泄物漂浮。發出陣陣臭味。

雖然近年政府努力整理渠道、收返禽畜飼養牌照，同埋加強撿控違例人士，但環境仍有待改善。大部份渠面喺長時期乾涸下，渠面不時有死魚、樹枝等垃圾，又因表面經常鋪滿泥塵，呢啲泥塵畀強風吹起，引致唔少環境問題。

現時元朗明渠兩邊，種咗些少樹，亦有些少長櫈畀人休息。但由於明渠景觀欠佳，欠缺涼亭等設施，淨係得好少老人家會用長櫈。明渠附近環境屬市中心（大馬路附近一帶）同工業區（橫洲附近一帶），環境一係過嘈，一係過僻，現時情況根本及休閒活動之用。明渠兩邊，長期畀人放置、棄置雜物，有礙觀瞻。

元朗市發展，集中喺元朗大馬路一帶，以致元朗明渠附近，人流相當擠迫，經常出現人車爭路嘅情況。長年日曬，加上人車密集，造成元朗區出現「熱島效應」，元朗市往往高市區氣溫兩三度。

此外，元朗區人口達四十幾萬，但無乜休閒用地。偶爾見到有青少年攀越圍欄，入明渠地基遊玩嬉戲，好鬼危險。

元朗明渠同附近環境確實有欠衛生、綠化及配套不足，社區長期欠缺休閒用地。呢啲問題急需政府部門解決。

• Topic:元朗明渠（維基學院）
• 明報新聞網海外版：元朗明渠擬復原自然河 拆除混凝土 減熱島效應
• 美化元朗明渠降區內高溫 新浪網
• 元朗明渠變清溪川觸礁