何來（英文名：Loy Ho，1965年—）係香港保育團體本土行動嘅主持人，香港獨立媒體常客，因為積極參與2006年保留舊中環天星碼頭事件同2007年保留皇后碼頭事件而出名。佢正職報稱係表演藝術創作人，係劇團「初生之犢」及《大嶼報》嘅創辦人，曾經響MyRadio網站開咪，反對香港政府行政暴力，主張爭取香港都市發展要由人民作主。

響2006年保留舊中環天星碼頭事件衝突中，何來曾經用刀𠝹爛地盤圍幕，事後刑事毀壞罪成^[1]，上訴亦被駁回。而響2007年保留皇后碼頭事件中，佢同朱凱迪申請司法覆核，要求阻止政府清拆皇后碼頭，但係敗訴。

2007年，何來出戰2007年香港區議會選舉觀龍選區 ^[1]，結果大比數輸畀民建聯副主席葉國謙。另外，佢亦參選2007年香港立法會港島選區補選，同前政務司司長陳方安生、前保安局長葉劉淑儀等等7名候選人爭個立法會議席，亦一樣爭輸。