佔領立法會係指2019年7月1號香港立法會綜合大樓畀一班反修例運動嘅激進示威者攻佔嘅事件^[1]。

事件導致立法會綜合大樓受嚴重破壞，預計需要用3個月時間復修，期間冇得開會，去到10月中先至開番會。

示威者早喺7月1號凌晨已經集結喺立法會綜合大樓嗰頭，本嚟諗住去灣仔金紫荊廣場喺香港特區成立紀念日升旗儀式抗議，但喺警方嚴密佈防下，最後都唔成功。

當日中午之後，幾十位示威者將目標轉去立法會綜合大樓，開始用鐵籠車撞爛門口落地玻璃，不過因為有防暴警察駐守大樓入面，示威者未有進入大樓。但係到約莫夜晚9點，警方突然撒退，幾十位示威者就趁住呢個機會衝入大樓，週圍塗鴉同大肆破壞，包括損毀歷屆立法會主席畫像，不過大樓入面嘅文物同圖書就未有被破壞。警方喺約莫10點半表示會短時間清場，示威者陸逐撤退，但有4位示威者堅持留守，最後都喺12點前畀其他示威者抬走。凌晨12點後，警方正式開始清場，嗰陣示威者已經走曬。

• 香港政府嚴厲譴責暴力衝擊行為，並無回應示威者嘅訴求。
• 立法會綜合大樓預計需要用3個月時間復修，耗資幾千萬港紙。
• 立法會2018-2019年度會期淨低嘅會都無得再開，財委會幾十項積壓議案都要10月打後先至有得審議。
• 嗰日晏晝示威者衝擊緊立法會綜合大樓嗰陣，警方向七一遊行搞手民間人權陣線提議將遊行終點提前到灣仔修頓球場，但係民陣唔同意，最後自行決定將終點改去中環遮打花園。不過有啲遊行人士仍然去原定終點添馬公園聲援嗰頭嘅示威者。

• 太陽花學運（2014年示威者佔領中華民國立法院）
• 2021年美國國會大廈衝突（2021年示威者武力攻入美國國會大廈）