朝鮮族（朝讀招，粵拼：ziu1 sin1 zuk6；中國朝鮮文：朝鮮族조선족，文觀部式轉寫：Joseonjok；中國標準羅馬字：Chosen，字母代碼：CS，數字代碼：10^[2]）係指喺中華人民共和國住而又有中華人民共和國國籍嘅朝鮮族人，喺中華人民共和國政府登冊嘅民族中，朝鮮族係56個中華民族之一。而喺韓國，據法務部嘅出入國外國人政策本部嘅統計資料就稱爲韓國系中國人hon4 gwok3 hai6 zung1 gwok3 jan4（韓國系中國人（한국계 중국인），文觀部式：Hangukgye Jungguk-in）。不過呢個係指親南韓嘅中國朝鮮族，至於親北韓嘅（尤其係延邊嘅朝鮮族）就叫朝鮮系中國人ziu1 sin1 hai6 zung1 gwok3 jan4（朝鮮系中國人（조선계 중국인），文觀部式：Joseongye Jungguk-in）。

喺韓國，朝鮮族呢個名作為自稱都用得幾多，但如果無分南北韓、包括埋中國朝鮮族嘅話，佢哋就會合稱爲大韓民族。而中國就無呢種政治、國籍之分，都按文化來睇叫做朝鮮族，就比較少叫做韓族。喺中華人民共和國，朝鮮族按人口計係第14大少數民族，主要住喺東北三省，最多嘅係延邊朝鮮族自治州。最近中國朝鮮族人口分佈漸趨分散，原因係而家中國經濟高速發展，東北朝鮮族啲人就出晒去中國大都市搵工，比如北京、上海、青島^[3] 。因為佢哋有語言優勢，有相當部分嘅朝鮮族人係去中國嘅韓國企業返工。

朝鮮半島同中國大陸嘅交流歷史好耐，前24世紀滿洲地方就住有今日韓國人嘅祖先民族。前10世紀朝鮮族嘅祖先濊貊族開古朝鮮國，前2世紀朝鮮族前身扶餘族（濊貊族一支）開扶餘國，前37年扶餘出身嘅朱蒙開高句麗國。高句麗後來畀大唐、新羅聯軍滅國，高句麗嘅一部分遺民同靺鞨族一齊開渤海國。渤海國統治咗朝鮮半島北部、滿洲地方、日本海沿岸。渤海亡國後，源自高句麗嘅一部分渤海遺民變成咗高麗國人，剩低嘅畀控制滿洲嘅北方民族統治咗。

有講法話17世紀初就有朝鮮人喺而家遼寧省定居^[4]，一般認為朝鮮人係17世紀末先開始部分移民到中國東北。當時係清朝，因為東北係滿族祖地而封禁，地廣人稀，就吸引咗朝鮮移民。啲人喺東北燒荒開地，除咗耕田就係挖蔘。1869年朝鮮半島北部大面積饑荒，好多朝鮮人越境入中國，結果清朝同朝鮮就時不時國境紛爭。朝鮮將圖們江中國呢邊嘅朝鮮移民居地叫做間島，鴨綠江呢邊嘅移民居華地叫做西間島。1885年清政府廢咗滿洲封禁令，朝鮮移民大清領土嘅情況更犀利。

1910年大韓帝國同大日本帝國合併，日本喺朝鮮收奪土地，令好多朝鮮農民失地，同時日本鎮壓朝鮮獨立運動，令好多各階層嘅朝鮮人移民去滿洲同濱海邊疆區。1931年7月2號喺滿洲吉林省長春縣三姓堡發生萬寶山事件，同年7月15號搞事記者金利三喺長春朴昌廈東亞旅館畀人暗殺。1932年日本扶立佢控制嘅傀儡國滿洲國，宣稱五族協和（滿族、日本人、漢族、蒙古族、韓國人），日本嘅滿洲國移民政策令東北朝鮮人劇增。呢個時期，唔單止喺間島地區有朝鮮人，成個滿洲都有做唔同職業嘅朝鮮人，據記載滿洲國有300萬朝鮮人。

喺近現代史，按韓國立場一般認為中國朝鮮族無咩點參與韓國獨立運動，反而從國共合作都參加毛澤東麾下軍隊、幫佢掌握中國作咗大貢獻，1949年中華人民共和國成立，解放軍嘅朝鮮族部隊、其次北韓嘅再編人民軍係朝韓戰爭嘅南下主力。1946年時中共就派朝鮮族去北韓，設立軍政大學，介入北韓初期嘅體制形成。之後，1949年8月北韓再編人民軍師團，中共第164軍做咗金昌德指揮嘅第5師團。其他嘅朝鮮族部隊係北滿、南滿嘅朝鮮族，而第164、166軍就係延邊地方入伍嘅朝鮮族，1950年大規模入北韓嘅就係呢批軍。之所以推遲一年入北韓，係因為當時重打緊國共內戰，要抽兵力過長江去南方前線，於是朝鮮族爲中共建政出咗分力。之後中共解放軍第4野戰軍隸下嘅各部隊分散配置。到國共內戰差唔多打完，1950年3月初河南省鄭州集結咗一萬五千幾人，發去北韓元山，作為北韓人民軍第7師團參加朝韓戰爭。另外重有將剩低嘅2500幾人嘅朝鮮族兵以及一啲獨立部隊編入第4野戰軍47軍，喺1950年4月28號入北韓，編成北韓人民軍第4師團18連隊參戰。中國共產黨喺1952年發表《民族區域自治實施綱要》。因為朝鮮族嘅軍事貢獻好大，就喺1953年吉林省東部劃出個延邊朝鮮族自治區，1955年時除區爲州，變成咗延邊朝鮮族自治州。當時由朝鮮族人就任州長來自治。直到今日啲人重認為朝韓戰爭喺抗美援朝，當時啲人祝福入伍嘅人，而家就有紀念活動。喺中國文革時，毛澤東嘅侄毛遠新主政延邊，引起咗民族紛爭，結果死咗好多人。特別係毛遠新設立紅色造反革命委員會，喺8月27號紅色反亂中拉埋紅旗戰鬥連軍、勞動者革命委員會、紅衛兵組織鎮壓有民族主義取向嘅朝鮮族人。當時死咗幾千人^[5]。

2010年9月中華人民共和國政府發佈嘅《長吉圖地區開放先導區》中，朝鮮族係作為核心角色^[6]。

延邊朝鮮族自治州成立60週年紀念出版咗夾埋100卷嘅《朝鮮族史料全集》^[7]。

而家推算中國住有200萬朝鮮族。呢個人口可同美國朝鮮族人數（包韓僑、韓裔）匹敵，可能係朝鮮半島以外最大嘅朝鮮族群。中國朝鮮族集中喺東北地區（滿洲），其中吉林大概120萬，吉林東部嘅延邊州就集中咗80萬。其他嘅，黑龍江（包哈爾濱）約45萬、遼寧（包瀋陽）約25萬、內蒙古約2千，此外呢啲大都市都好多：北京、天津、上海、青島、廣州、深圳。此外各地嘅朝鮮族聚居地都設置咗朝鮮族自治縣、民族村（鄉、鎮）。喺東北三省嘅中心都市都有朝鮮族嘅學校、廣播電臺、報社、出版社，同時呢啲機關喺中國推廣韓文。

自1992年韓國同中國建交以來，好多朝鮮族人以移民，或者同韓國人結婚歸咗韓國籍，令中國朝鮮族人口下降。近年來中國朝鮮族後生有畀漢族同化嘅趨向。亦都自92年建交以來，中國朝鮮族同韓國人越來越多接續，朝鮮族過韓國，或者韓國人去朝鮮族地區嘅現象都增加咗。據韓國行政安全部嘅《外國人住民現況》，2011年，有50萬中國朝鮮族住向韓國，而入韓國籍嘅有2萬6千650人。^[8]估計家下有30%以上嘅中國朝鮮族去咗韓國。^[9]

中國朝鮮話係中國政府據北韓嘅國語文化語再構出來嘅官方標準語，此外因為中國經濟發展同都市化，朝鮮族人同漢族人交流得更多，越來越多朝鮮族人講唐話。甚至有啲朝鮮族人細個時返漢族學校，遠離咗朝鮮社區，結果唔多識韓文。朝鮮族大多出身自朝鮮半島北部嘅平安道、咸鏡道，所以鄉下嘅方言大多講呢兩個地方嘅方言。

雖然中國朝鮮族同韓國人係同胞，但受中國推行嘅意識形態教育、宣傳，佢哋都認自己係噉多個中華民族中嘅一員，係中國人，同韓國人「同一民族、同一國家」嘅國族觀念有種種磨擦。^[10]

朝鮮族喺衣著、飲食上同韓國人差唔多，比如，喺大時大節會著韓服，食泡菜、韓國燒烤、狗肉，夏天時會食補品。不過近年來無論語言定習慣都開始漢化，因為有啲父母覺得適應到漢族地方嘅生活會更有前途，於是放棄咗自身民族教育，送仔女去漢族學校返學，結果有啲朝鮮學校因為生源減少而執笠。

信教嘅人唔多，因為喺李氏朝鮮末期有大批人移民中國，受儒教文化好強影響嘅朝鮮儀禮保存落來、宣揚入世嘅儒家觀念，同時佛教同土俗信仰合成嘅民間宗教都幾風行。近年來因為同韓國、美國接續多咗，都有啲人信天主教、新教。

「朝鮮族」呢個名本來係中國對呢個海東民族嘅稱呼，喺舊時漢字文化圈呢個名以漢字形式入咗韓文。而家中國嘅身份證「朝鮮族」係呢個民族嘅官方名，據而家中國嘅民族政策，身份登記上叫少數民族、冠親個民族名，都有特惠政策，比如唔受「一對父母一粒仔女」嘅獨生限制。所以中國朝鮮族對呢個名無咩意見。

不過喺1988年韓國自由化之前，啲人受民族情緒影響，認為無論係「在日僑胞」、「在美僑胞」、「在中僑胞」，都係叫「韓民族」，要文化純化、正名，認為「朝鮮族」呢個名貶低咗佢成個族，但呢個係誤解。韓國政府就唔用「朝鮮族」呢個名，而用「韓國系中國人」指代中國朝鮮族，屬「在外同胞」中一類。

• 韓僑
• 高麗人 (中亞)
• 庫頁島朝鮮族
• 鳳梧洞戰鬥
• 萬寶山事件
• 中華民族

1. ↑ 《재외동포현황 Current Status of Overseas Compatriots》, South Korea: Ministry of Foreign Affairs and Trade, 2009, 原著喺2010-10-23歸檔, 喺2009-05-21搵到
2. ↑ 〈中國各民族名稱的羅馬字母拼寫法和代碼〉. 中國社會科學院民族研究所. 1992年4月1號. 原著喺2011年11月15號歸檔. 喺2015年4月6號搵到.
3. ↑ 854,000人，2000年調查。
4. ↑ 朴鍾國 (2010-09-20), 〈中서 400年血統 지켜온 「本溪朴씨」〉, 《聯合뉴스》, 喺2010-09-22搵到
5. ↑ 황희경，文化大革命 時期 朝鮮族에게는 무슨 일이 互聯網檔案館嘅歸檔，歸檔日期2014年2月3號，.，聯合뉴스
6. ↑ 朴鍾國 (2010-09-14), 〈中「長吉圖建設，朝鮮族이 핵심 役割」〉, 《聯合뉴스》, 喺2010-09-16搵到
7. ↑ 朴鍾國 (2010-12-06), 〈中100卷份量「朝鮮族史料全集」出版推進〉, 《聯合뉴스》, 喺2010-12-08搵到
8. ↑ 《朝鮮族1%時代》①膨脹하는 朝鮮族 타운，聯合뉴스
9. ↑ 柳燃山，朝鮮語의 現주소와 未來志向에 대한 考察 互聯網檔案館嘅歸檔，歸檔日期2014年8月19號，.
10. ↑ 「中國同胞差別로 故國觀變化」<中同胞 언론인>