上村（英文：Sheung Tsuen）係香港元朗區八鄉嘅一條原居民村落，一帶全部係低密度嘅住宅同車場（以劏車場常見），環境相對僻静。

黎族二世祖黎忠卿喺宋朝由江西搬去廣東新會，佢嘅子孫日漸繁衍到東莞同錦田一帶，但本土鄧氏喺當地勢力強大，迫使到黎氏第十三世祖黎會雲最後帶領族人搬去上村祠堂村，跟住由第廿四世祖黎金泰去建立黎屋村，並起咗黎氏大屋同植桂書室^[1]。

1899年4月喺香港新界發生一場英國軍隊同新界原居民間叫做「新界六日戰」嘅戰爭，起因英國接收新界地區之後，以屏山鄧氏為首嘅新界原居民各大氏族，反抗英國嘅統治，其中三場主要嘅戰役分別喺大埔梅樹坑、林村林村凹同上村石頭圍展開。

4月17號英軍進入上村附近駐守，同時另一支英軍，北上途經泰坑、粉嶺，逐條村投降後再轉入八鄉支援。4月18號，喺林村凹潰敗嘅村民同英軍喺石頭圍東北，隔岸對戰，英軍沿住水道佈防，直到村民發動進攻到達約二百碼範圍時英軍先至開槍，呢場戰役中村民傷亡慘重，好快就敗走，英軍再追趕敗軍直至到入夜。4月19號，村民投降，六日戰爭結束^[2]。

• 八鄉古廟
• 植桂書室
• 黎氏大屋
• 黎氏宗祠
• 上村公園回歸紀念柱

到達嘅公路有林錦公路、錦田公路、荃錦公路同錦上路。