Pang-chān:獅球嶺炮臺
 |
Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún. |
獅球嶺炮臺（英語：Shihciouling / Shih-chio-ling Fort）是位佇臺灣基隆市仁愛區獅球嶺兮一个炮臺遺蹟。這个炮臺是佇清領時代起兮，目前是基隆市兮市定古蹟。
歷史[siu-kái | kái goân-sí-bé]
獅球嶺炮臺位佇臺灣東北，嘛是日本菲律賓航線兮中央，往來兮船隻攏愛佇遮運補。所以自十七世紀以來，逐个政權西班牙、荷蘭、東寧、清朝、日本佮中華民國攏意識著獅球嶺砲臺兮重要，並且起防禦建設。
清領時代
光緒時代進前，基隆兮砲臺攏是為著應付敵人兮攻擊，光緒元年（1875年）受著洋務運動推行兮風潮影響，閣有清國受著日本入侵兮刺激，對臺灣軍事規劃改做「起洋式砲臺」，獅球嶺砲臺佇清光緒十年（1884年）開始起，傳說是清國巡撫劉銘傳為著防禦法軍，請英國兮技師來起炮臺，嘛是清國守護基隆通往臺北兮上尾一道防線。
仝年（1884年），清國佮法國因為越南兮問題，爆發清法戰爭。法國為著莫予戰線傷長，著改做以福建海域做主要戰場。福州、基隆著自按呢變成主要戰場。彼當陣清國著予劉銘傳親自前往監督，佇獅球嶺指揮，攻擊法軍。法軍共獅球嶺炮臺拍落來以後清軍欲反攻攏無成功，落尾是甲法國佮清國簽條約才離開。
日本時代
甲午戰爭了後，光緒二十一年3月23（1895年4月17），清國佮日本簽訂馬關條約，共福建臺灣省割予日本。因為馬關條約進前佮當地軍民無共識，所以佇4月29（1895年5月23）臺灣發表〈臺灣民主國自主宣言〉，成立臺灣民主國軍隊，乙未抗日戰爭開始。清國進前佇基隆港建立兮防守設施自然著變成守軍抗日兮靠山。毋過日軍選佇貢寮登陸，閃開守軍佇基隆港兮主力，予當時大部份兮砲臺無法度發揮原本按算兮戰力。干焦有獅球嶺砲臺，拄仔好對著日軍登陸兮所在攻擊日軍，予日軍進攻失利[1]:139-140。
1934年到1945年，獅球嶺兮火力有一寡變動，予伊會使達著海防兮需求[1]。 另外，佇日露戰爭當中，日本嘛有特別加強佇基隆兮逐个炮臺，防止露西亞攻擊臺灣。
戰後
獅球嶺砲臺沓沓仔荒廢，失去軍事功能，目前干焦賰石造指揮所、砲座佮彈藥庫等幾若个遺跡，1985年8月19，獅球嶺砲臺夆指定做第二級古蹟，以後閣改做市定古蹟，因為視野足闊，近年獅球嶺砲臺附近嘛開發變做公園，已經成做民眾𨑨迌兮景點之一。
地理位置[siu-kái | kái goân-sí-bé]
-
獅球嶺炮臺看出去兮基隆市區
獅球嶺砲臺懸150公尺，位佇基隆港南方，中山高速公路大業磅空頂懸，因為地勢較懸而且閣佇內陸，成做基隆港兮重要防線，佇遮會使看著規个基隆市區，上遠閣看會著基隆嶼，會使有效掌握規个港區船隻出入佮振動兮狀況，前往砲臺會使開車對中山高速公路上北，出基隆交流道了後，正斡忠四路直直行，閣正斡成功路，過成功路橋以後正斡著到矣。
設施[siu-kái | kái goân-sí-bé]
獅球嶺砲臺會當分做西、中、東三兮區域。
中炮臺
中炮臺這馬干焦賰一座砲座、彈藥庫佮石造指揮所，主要兮材質攏是砂岩。
西炮臺
西炮臺位佇離中炮臺2公里兮山頂，有留落來紅毛塗炮壘、彈藥庫、小型營舍、佮一个砲盤遺跡，目前部分區域予雜草閘咧。佇平安宮附近有湘軍之墓，佮西炮臺略仔無仝兮砲盤佮庫房遺跡。
東炮臺
東炮臺位佇獅球嶺山東爿，大業磅空偏東兮山坡頂懸，佇文獻當中法軍共叫做鷹巢炮臺，伊兮營舍形式含大細攏佮中炮臺營舍非常倚近，目前兮遺跡干焦賰石造庫房大門、砲盤、彈藥庫佮觀測炮壘，這馬全部攏予雜草閘咧，保存程度較䆀。
閣看[siu-kái | kái goân-sí-bé]
- 基隆要塞
- 二沙灣炮臺
- 頂石閣炮臺
- 社寮東炮臺
參考資料[siu-kái | kái goân-sí-bé]
- ↑ 1.0 1.1 許毓良 (2002年12月). "基隆獅球嶺砲台考". 臺北文獻 (ēng Hôa-gí). 臺北市: 臺北市文獻委員會. 直字 (142): 123–149.
- ↑ 戴震宇 (2003年2月). 台灣的城門與砲台. 台灣地理百科 (ēng Hôa-gí). 新北市: 遠足文化. p. 34-43. ISBN 9573049333.
外部連結[siu-kái | kái goân-sí-bé]
Text is available under the CC BY-SA 4.0 license; additional terms may apply.
Images, videos and audio are available under their respective licenses.
