On live, c' est on moncea d' foyes di papîs avou des scrijhaedjes dissu (ey eto des desséns, des fotos), et rloyeyes po k' ele tinénxhe eshonne. (C' est nén come les gazetes, et les rvowes).

Les lives e walon sont metous so ene pådje tote seule.

Sacwants lives e walon sont prezintés par ôre alfababetike cial.

Les lives sont fwaits pa onk u sacwants scrijheus(es), k' on lome eto oteurs (otorresse). I plèt esse eto å no d' on moenneu ki rashonne les scrijhaedjes di sacwants oteurs. Pacô c' est on rcwereu ki replaide on live dedja sôrtou la lontins. C' est l' replaideu.

Les lives sont eplaidîs pa des eplaideus (editeu u publiyeus). I polèt-z esse replaidîs onk u sacwants côps, sorlon li dmande.

I sont-st imprimés pa èn imprimeu.

On live est rascovrou pa ene coviete, sovint avou do pus spès papî. Gn a padecô ene sorcoviete. Li coviete mostere li tite do live, et l' no do scrijheu; sovint eto l' eplaideu et l' anêye.

Li coviete do drî u cou-coviete est foirt consecante. Sovint, gn a la des racsegnes pus spesses so li scrijheu et dissu l' live.

Li prumire pådje avou l' papî normå riprind sovint les minmes sacwès kel coviete. C' est l' coviete divintrinne.

Å cou del coviete divaintrin, u vizon vizu, on-z a cobén les dnêyes so les abondroets, li depot lweyå, li limero ISBN.

Divant d' ataker l' live, gn a sovint èn adrovaedje pa ene rilomêye djin ki va préjhî u prezinter li scrijheu.

Gn è pout aveur eto ene adviertance ås lijheus, la kel sicrijheu vout advierti di sacwants ponts (sovint po-z espaitchî les criticaedjes).

Al fén, gn a sovint ene tåve, k' on lome eto "kitaeyadje do live".

On pout aveur, al dierinne pådje, des racsegnes so l' imprimeu, li saetchaedje (nombe d' egzimplaires), l' anêye.

Li djoû k' on live rexhe, on fwait kécfeye on strimaedje. L' oteur, adon, va dicåçter s' live.

Les lives sont vindous dins les livreyes. Les vîs lives sont vindous pa des vîs-livrîs (boukinisses). Po fé li rclame des lives, gn a kécfeye des fôres ås lives.

• lives di belès letes
  • romans
  • pitit roman
  • ramexhnêye d' arimés
  • schôtlêye di tecses
• biyografeyes et sovnances
  • biyografeye
    • otobiyografeye
  • live di sovnances
• antolodjeyes
• lives avou des imådjes
  • binde d' imådjes
  • live d' imådjes
• live di tchansons
• lives po studyî
  • live di scoles
  • motîs
• live di rcetes
• lives rilidjeus
  • live di messe
  • såmtî