Damasse, c' est l' mwaisse veye del Sireye.

Ene des pus viyès veyes del Daegne, pol moens 8000 ans viye.^[1]

Mark Twain a scrît so Damasse, et si scrijhaedje a stî rmetou e walon:

Damasse, c’ est ene owazisse ki ses aiwes n’ ont måy falou po des meyes d’ ans et d’ razans. Alez ossu lon k’ vos vloz dins l’ wague passé des cités, todi i gn ourit-st ene Damasse. I gn aveut nén co yeu d’ evenmint edjîstré sol Daegne ki Damasse egzistéve dedja, presse po ndè rçure les noveles.

Dins les scrijhaedjes di tot l’ minme ké sieke so pus d’ 4.000 ans å long, si no est mincioné et ses prowesses tchantêyes.

Po Damasse, les anêyes, c’ est djusse des moumints, les decådes seulmint des furlokes do tins. Ele ni mzeure nén l’ tins nén pa les anêyes mins pas les Impires k’ ele a veyou s’ elever, lure et croûler e rwenes.

Ele veya Baalbek et Tebe eyet co Efeze crexhe et divni di pouxhantès veyes. Mins Damasse vica po lzès vey dispeuplêyes.

Ele veya l’ Impire d’ Israyel da David et Solomon egzalté, eyet el veya anixhilé.

Ele veya l’ brotchance del Grece eyet l’ Impire d’ Alegzande flori et mori.

Ele veya Rome si basti; ele veya si impire rascovri l’ monde; ele li veya peri.

Damasse a veyou tot çoula, ey ele vike co.

S’ i n a des ôtès veyes sol Daegne ki rclamèt k’ on les lome Cité Eternele, dj' a les pinses ki c’ est Damasse ki merite di plin droet on sfwait tite.^[2]

Et dins èn ôte live, i dit co:

Damasse, vos estoz li piele do Levant, li firté del Sireye, el Djårdén d’ Eden des prumîs tins, li måjhone des princes, des djînes des ledjindes, des contes des 36.000 nutes, di l’ acî d’ Damasse foirt et côpant come on raezoe, del soye di Damasse doûce come li mashale d’ ene djonne båshele. Vos estoz li seule veye sol Daegne k’ a wårdé s’ no eyet tnou s’ plaece, etot rwaitant påjhûlmint les impires ki passént goster leu ptite såjhon di firté et d’ grandeur, divant di si svani eyet toumer el roviance.^[3]

1. ↑ Pablo Sarachaga, Li Rantoele 79, erî-tins 2016
2. ↑ Mark Twain, « The Yankees Abroad » (les djancaises foû payis), ratourné e walon pa Pablo Sarachaga, Li Rantoele 69, erî-såjhon 2016
3. ↑ Mark Twain, The Innocents Abroad » (les enocins foû payis), come cial ådzeu.

I gn a so les cmons Wikipedia des imådjes ou fitchîs son a vey avou Damasse .