Bernard Louis
Bernard Louis, c' est on scrijheu e walon k' a skepyî li 3 d' fevrî 1947 a Nametche.
Vicåreye et ouves e walon
Il a shû les cours di walon ås Relîs Namurwès e 1992. Il atake do côp avou des ptits bokets ki seront-st eplaidîs dins les Cayés Walons a cmincî di 1995.
Il prindeut pårt eto ås copinreyes come li Soce des rcåzeus del Basse Årdene a Bietris. Did la, i mousrè al Rantoele, et-z î esse penleu èn an å lon (1999). I va eto ås raploûs des «Walons Scrijheus d' après l' Ban-Bwès» (di 1998 disk' al fén del soce e 2005). Il fourit ossu administrateur å Coirneu a Hu.
Costé teyåte, i va renonder li dramatike "Les Falijhes" a Nametche (2003).
Dispu l' moes d' djanvî 2003, il cåze dins l' posse a l' emission radio e walon "eshonne" (èchone) a "Cyclone RCF" (98.7 FM a Nameur), ki rpasse so les fis a "Radio Musicadeon" dispu 2006.
Il a stî publiyî dins l' pitite coleccion del SLLW : Tot fiant betchî l' coq, ene ramexhnêye di noveles (2003).
E 2008, i scrît ene rîlêye d' årtikes biyografike so les scrijheus d' après Nameur dins l' Rantoele-gazete.
E 2010, il est rçû al SLLW. Dispu 2 ans, aveut rarindjî Pa totès stroetès voyes da Auguste Laloux ki rexhrè come live li minme anêye.
I ratoûnrè sacwants lives d' imådjes e walon, come «Miyin et Morice», ou co «Li nute divant l' Noyé», Li ptit prince; adon pwis, Les aviretes d' Alice.
E 2013, i rprind l' sicretariat des Relîs namurwès et esse lomé prezidint di l' SLLW; il î dmorrè disk' e 2019.
Todi e 2013, i boute so on live di totes les ouves da André Henin.
E 2019, i ratoûne e walon èn imådjî (mes 1000 prumîs mots d' walon).
E 2020, i rexhe èn ramexhnêye di xhilteas, «Les sints e leus viyaedjes» dins l' pitite coleccion del SLLW. Il aveut eto emantchî on limero a pårt des Cayés walons po les 50 ans après l' vudaedje do roman «Li Ptit Bert» da Augusse Laloux, ki rprindeut tot les saetchîs-foû do live dins des antolodjeyes et ôte pårt.
Al fén d' l' anêye, i fjha rexhe on live di haycous, On dmey cint d' haycous.
Hårdêyes difoûtrinnes
- Pådje avou sacwants d' ses scrijhaedjes (so l' Aberteke)
- Ôte pådje (avou l' accint d' Nametche, (sol waibe "Li walon d' emon nozôtes")
Fåve e walon sol waibe Lowlands- (fr) Si pådje so ene Rantoele di soçnaedje (Fesbok)
- Prezintaedje d' on ratournaedje e walon (do Ptit Prince)
- Emission RCF k' il î lét di ses tecses (pa Bernard Van Vynckt)
Text is available under the CC BY-SA 4.0 license; additional terms may apply.
Images, videos and audio are available under their respective licenses.
