Vepsän ülüz (ven.: Вепсовская возвышенность) om ülüz Venäman lodehes, Päivnouzmevropižen tazangišton pohjoižes. Mülütadas Valdain ülüdehe tobjimalaz.

Ülüz levigandeb Leningradan agjan homendezbokas (Pöudon, Boksitogorskan i Tihvinan rajoniš) da Vologdan agjan lodehes (Vitegran rajon). Pohjoine agj sijadase läz Änižen suvirandad.

Korktuz om 304 metrhasai valdmeren pindan päl, kaikiš korktemb čokkoim om ven.: Мальгора, Vitegran rajon. Toine korged čokkoim om Gapsel'g (ven. Гапсельга) Leningradan agjas, 291 m ü.m.t. kortte.

Rel'jef om kukhikaz karstan nägusinke, tahond om järvikaz. Erasiden järviden vezi kadob pordaigaližešti, i Šimjärven kel'dtaho om sätud vl 1978 kaičemha da tedoidamha niid ülüden päivnouzmas. Londuseline i kul'turine Vepsän mec-kel'dtaho om ülüden päivlaskmas vspäi 1999.

Ülüz om vezijagandaks Baltijan i Kaspijan meriden basseinoiden keskes. Nened joged augotadas ülüden pautkil da järvil: Šokš, Ojat', Kapš, Paksjogi, Tutok i Javos'm (kaik — Süvärin hurapol'ne bassein), Nožem i Kalažjogi (Sudan joginiškad).

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.