Ril'sk
Рыльск

Lidnanznam	Flag
Valdkund	Venäma
Eläjiden lugu (2017-01-01)	16,319 ristitud
Pind	16,26 km²
Pämez'	Vladimir Koval'čuk (16 viluku 2020—. velgusentäutai)
Telefonkod	+7−47 152-xx-xxx
Avtokod	46
Aigvö	UTC+3 (MSK+0)

Ril'sk (ven.: Рыльск) om Venäman lidn, lidnankund da avtotesol'm Kurskan agjan päivlaskmas. Se om Ril'skan rajonan administrativine keskuz.

Eländpunkt mainitase ezmaižen kerdan aigkirjas vl 1152 nügüdläiženke nimitusenke. Nimi sündui severskalaižiden paganusen Jarilo-jumalan pühäsijan tagut nügüd'aigaižen lidnan kukhan päl. Ril'sk oli ühtennimižen ruhtinazkundan pälidnaks 12. voz'sadan keskespäi vhesai 1523, sid' kändihe Venäman palaks. Oli mülünu Sur'he Litvanman ruhtinazkundha (1360-nded voded — 1500). Ril'sk sai makundan lidnan oficiališt statusad 18. voz'sadal. Vl 1894 raudtesarak tuli lidnha. Toižen mail'man sodan aigan lidn oli okkupiruidud nacistoil (5. reduku 1941 — 30. eloku 1943).

Ril'sk šingotase kancelärižiden ladlüsiden tegimel, sömtegimištol (saguden edheotand, sahartegim, leibtegim) i turizmal.

Lidn sijadase rajonan päivnouzmaiženno röunanno, Seim-jogen muugotil randoil (ven.: Сейм 696 km pitte, Desnan hura ližajogi), 160 m ü.m.t. keskmäižel korktusel. Matkad Ukrainhasai om 30 km päivlaskmha i lodeheze orhal. Matkad Kurskhasai om 105 km päivnouzmha orhal, 126 km avtotel vai 140 km raudtel. Lähembaine lidn om L'gov 41 km päivnouzmha orhal, 46 km avtotedme vai 65 km raudtedme. E38-avtomaršrut (Ukrainan pohjoine — Kazahstanan suvi) läbitab lidnad. Ril'sk-raudtestancii radab Seiman hural randal, se om 24-kilometrižen sarakon lopstancii Korenevo-stancijaspäi.

Ril'sk om lidnankundan üks'jäine eländpunkt. Lidnankundan pind — 16,26 km².

Vl 1939 lidnan ristitišt oli 12 401 eläjad. Vn 2010 Venäman rahvahanlugemižen mödhe eläjiden lugu oli 15 671 ristitud, rajonan pol'. Kaikiš suremb lidnan ristitišt oli 19 472 eläjad vl 1989 i 19 400 eläjad vll 2000−2001. Ortodoksižen hristanuskondan kaks' päjumalanpertid, kaks' jumalanpertid i nell' časounäd oma olmas lidnas^[1], mugažo ph. Mikulain mez'jumalankodi radab ani lidnan pohjoižröunan taga.

Rahvahad (2010): venälaižed — 97,0%, ukrainalaižed — 1,5%, toižed rahvahad — 1,5%.

Professionaližen opendusen aluzkundad oma Ril'skan agrarine tehnikum^[2] i Ril'skan aviacine tehnine kolledž^[3].

• 
  Lidnan tobmuden pert'
• 
  Jumalanmaman Katken päjumalanpertin nägu
  vl 2011
• 
  Aviacine tehnine kolledž
• 
  Istorine muzei
  (torguindrivid ende)
• 
  Vanh avtotesild Seimas päliči ph. Mikulain mez'jumalankodinke tagamal

1. ↑ Ril'sk-lidnan pühäpertid sobory.ru-saital. (ven.)
2. ↑ Ril'skan agrarižen tehnikuman sait (rat-agro.ru). (ven.)
3. ↑ Ril'skan aviacižen tehnižen kolledžan sait (авиаколледж.рф). (ven.)

• Lidnankundan oficialine sait (admrylsk46.ru). (ven.)

Ril'sk Vikiaitas