Kasli
Касли

Lidnanznam	Flag
Valdkund	Venäma
Eläjiden lugu (2023)	15,006 ristitud
Pind	39,76 km²
Pämez'	Jekaterina Vasenina (kezaku 2017—, rat'kaigoidenke )
Telefonkod	+7−35 149-xx-xxx
Avtokod	74, 174
Aigvö	UTC+5 (MSK+2)

Kasli (ven.: Касли́, bašk.: Кәҫле vai Кәһте paginoiš, tot.: Кәсле) om Venäman lidn da lidnankund Čeläbinskan agjan pohjoižes. Se om Kaslin rajonan administrativine keskuz.

Eländpunktan aluz om pandud vl 1747 kuti Kaslinskii-žilo sauvomha da holitamha kaugedraudan tegint, nimitihe järviden mödhe. Kätihe radnikžiloks vl 1929. Kasli sai lidnan statusad vn 1942 29. päiväl heinkud. Sirtihe eläjid aigaks radiacižen avarijan tagut «Majak»-tegimel vn 1957 sügüz'kul.

Kasli šingotase kaugedraudan čomamahtoližen valamižen tegimel, radiotegimel (kaičendsignalizacii, sodaelektrotehnik), mugažo kalategim i omblendfabrik ratas lidnas.

Lidn sijadase rajonan suvipäivlaskmaiženno röunanno. Se om ümbärtud nenil järvil: Irtäš-järv-vezivaradim (bašk.: Ирташ, 227 m ü.m.t., 53,5 km²) om lidnan suvirandaks, Sur' Kasli-järv (bašk.: Оло Кәҫле / Оло Кәһте, 20,5 km²) — pohjoižrandaks, Kireti-järv (7,4 km², 230 m ü.m.t.) om lodehes, Pen' Kasli i Kutaši päivnouzmas. Järved mülüdas Iset'-jogen oigedpol'žhe basseinha, kanal ühtenzoitab Sured Kasli-järved Irtäšunke lidnan päivlaskmas.

Matkad lidnaspäi Čeläbinskhasai om 90 km suvipäivnouzmha-suvhe orhal vai 125 km avtotel. Lähembaižed lidnad oma Ozörsk 15 km suvhe orhal vai 20 km avtotedme i Snežinsk 22 km pohjoižhe orhal vai 27 km avtotedme.

Prigorodnii-žilo (32 rist. vl 2017) mülüb lidnankundha Kaslin ližaks. Lidnankundan pind — 243,54 km².

Vn 2010 Venäman rahvahanlugemižen mödhe lidnan eläjiden lugu oli 16 969 ristitud, lidnankundan — 17 032 ristitud, rajonan pol'. Kaik 16 263 ristitud elihe lidnas i 16 295 ristitud kaikes lidnankundas vl 2017. Kaikiš suremb lidnan ristitišt oli 20..21 tuhad eläjid vll 1939−1992 (21 837 rist. vl 1959, kaks' vot jäl'ghe avarijad).

Rahvahad (2010): venälaižed — 92,3 %, baškiralaižed — 2,7 %, totarlaižed — 1,9 %, toižed rahvahad — 3,1 %.

Ortodoksižen hristanuskondan koume pühäpertid^[1] oma avaitud lidnas: Sündun Voznesenjan jumalanpert' (1852), ph. Mikulai Likijalaižiden Mir-čudonsädajan jumalanpert' (1861), ph. Serafim Sarovalaižen časoun'. Venäman amuižortodoksižen hristanuskondan Pedroi- i Pauloi-apostoloiden pühäpert' om saudud vll 2010−2013.

Kaslin tegimištoliž-gumanitarine tehnikum^[2] om lidnan professionaližen opendusen aluzkundaks.

• 
  Läžundkodin (Omblendfabrikan) ansambl' (2014)
• 
  Sündun Voznesenjan jumalanpert' (ortodoksine hristanuskond), vn 2014 nägu
• 
  Kodilezi kaslin valamižespäi Ipatjevan pertiš (Jekaterinburg, 2021)
• 
  Fontan kaslin valamižespäi läz profškolad (2018)
• 
  Istorižen läžundkodin sauvuz (2018)

1. ↑ Kaslin pühäpertid sobory.ru-saital. (ven.)
2. ↑ Kaslin tegimištoliž-gumanitarižen tehnikuman sait (prof18.nubex.ru). (ven.) (+ äikel'ne avtomatine känduz)

• Lidnankundan oficialine sait (gorod-kasli.ru). (ven.)

Kasli Vikiaitas