Jasnii
Ясный

Lidnanznam	Flag
Valdkund	Venäma
Eläjiden lugu (2021)	15,092 ristitud
Pind	67 km²
Pämez'	Tat'jana Silant'jeva (tal'vku 2015—)
Telefonkod	+7−35 368-xx-xxx
Avtokod	56
Aigvö	UTC+5 (MSK+2)

Jasnii (ven.: Ясный) om Venäman lidn Orenburgan agjan suvipäivnouzmas. Se om Jasnijan lidnümbrikon üks'jäine lidn, nimitihe lidnümbrikod rajonaks vspäi 1979 vhesai 2015.

Vl 1935 löuzihe azbestad läz kazahlaižiden Kijembai-küläd. Jasnii-eländpunktan aluz om pandud vl 1961 žiloks samha azbestad Kijembain löudmižsijal da sauvomha Kijembain azbestan kaivuzkombinatad. Žilo oli lidnanvuiččen vspäi 1962. Se sai lidnan statusad vl 1979.

Lidn sijadase Suvižes Uralantagaižes, 360 m keskmäižel korktusel valdmeren pindan päl. Matkad Orenburghasai om 480 km päivlaskmha, Kazahstanan röunhasai — 24 km suvhe (Aktoben agj). Lähembaine Mägipölvaz-raudtestancii (ven.: Горный Лён) sijadase koumes kilometras suvhe lidnaspäi. Lähembaine lidn om Orsk 115 km päivlaskmha avtotedme vai 95 km orhal.

Sodalendimpöud sijadase Jasnijan lodehližel röunal, Komarovskijan lidnümbrikos. Ühtennimižed sodapoligon da kosmodrom (radab vspäi 2006) oma läz lidnad.

Kaik 17 žilod mülüdas lidnümbrikho Jasnijan ližaks. Lidnümbrikon pind — 3565,32 km².

Vn 2010 Venäman rahvahanlugemižen mödhe lidnan eläjiden lugu oli 17 363 ristitud, nell' videndest rajonan ristitištos, lidnümbrikon — 22 406 ristitud. Kaikiš suremb lidnan ristitišt oli edel Komarovskijan lidnümbrikon (sauptud administrativiž-territorialine ühtnik) sädandad — vozil 1989, 2003 i 2004, 26..27 tuhad eläjid.

Ortodoksižen hristanuskondan kaks' jumalanpertid^[1] oma olmas lidnas: Sündun Voznesenjan i Panteleimon-spravitajan.

Kaivuztehnologine tehnikum^[2] om professionaližen opendusen aluzkundaks.

• 
  Kumakskoje-vezivaradimel (2011)
• 
  Jasnii-kosmodroman sauvused vl 2012

1. ↑ Jasnijan pühäpertid sobory.ru-saital. (ven.)
2. ↑ Jasnii-lidnan Kaivuztehnologižen tehnikuman sait (gapougtt56.ru). (ven.)

• Lidnümbrikon tobmuden aluzkundoiden oficialine sait (ys.orb.ru). (ven.)

Jasnii Vikiaitas