Ł' ałergia^[1] ła xe na reaxion infiamatoria scadenà dal sistema imunitario contro sostanse foreste entrà nel' organismo (ałergeni) e che no łe fa mal par gnente, de suo, inte i sogeti normali (polini, acari, mufe, magnari ecetera). Ła paroła ła xe sta doparà par la prima volta dal pediatra vienese Von Pirquet inte el 1906 e ła deriva dal greco, inte el senso de "axion o reaxion contro l'altro, queło che vien da fora". Łe reaxion del'organismo contro "queło che vien da fora", anca se nol fa mal, łe porta dani anca seri al'organismo steso, fin a ła morte (in te l'anafiłasi). Se ga visto che i mecanismi coi cuałi el sistema imunitario el risponde in maniera sbalià, "ipersensibiłe", i xe diversi e i xe sta identificà inte ła clasificaxion de Gell e Coombs. Par convension, doramai, se riserva el termine "ałergia" in senso streto a łe reaxion de 1° tipo o imediato, anca se ghe xe łe ałergie de 4° tipo o ritardà (łe dermatiti da contato). Ł'ałergia imediata o de 1° tipo ła xe scadenà, inte i sogeti predisposti geneticamente, da de łe imunoglobułine discoverte inte el 1966 a Denver dai sposi giaponesi Ishizaka: łe imunoglobułine E o IgE.

• Alergia ai acari

• Wikimedia Commons el detien imàjini o altri file so Ałergia