دریائے رائن
دریائے رائن جرمنی کا مشہور دریا اور آبی گزرگاہ ہے جو سوئٹزرلینڈ میں الپس کے پہاڑی سلسلے سے نکلتا ہے اور پہلے سوئٹزرلینڈ اور پھر فرانس کے ساتھ بین الاقوامی سرحد کا روپ دھارتا ہوا جرمنی میں داخل ہوتا ہے اور بالآخر نیدرلینڈز سے گذر کر بحیرۂ شمال میں جا گرتا ہے۔ 1233 کلومیٹر (766 میل) طویل رائن یورپ کا 12 واں سب سے بڑا دریا ہے۔
یہ رومی سلطنت کے عہد سے جہاز رانی کے قابل دریا ہے اور تجارت و اشیا کی نقل و حمل کے لیے ایک قابل بھروسا ذریعہ رہا ہے۔ یہ جرمنی کا سب سے بڑا دریا ہے جس میں نیکر، مین اور بعد ازاں موزیل گرتے ہیں۔ دریا کا سالانہ اخراج 2290 مکعب میٹر فی سیکنڈ (81 ہزار مکعب فٹ فی سیکنڈ) ہے جبکہ اس کی اوسط چوڑائی 400 میٹر (1300 فٹ) ہے۔
سوئٹزرلینڈ میں بازیل، فرانس میں اسٹراسبورگ، جرمنی میں مین ہائیم، لڈوگشافن، مینز، بون، کولون، ڈوسل ڈورف اور نیدرلینڈز میں یوتریخت اور روٹرڈیم جیسے بڑے شہر اسی دریا کے کنارے واقع ہیں۔
دریائے رائن سوئٹزرلینڈ، آسٹریا اور جرمنی کی سرحدوں پر مشہور جھیل کونسٹانس بھی تشکیل دیتا ہے جو جنوب مغربی جرمنی کے لیے پینے کے پانی کا سب سے بڑا ذخیرہ ہے۔
متعلقہ مضامین
[ترمیم] |
ویکی ذخائر پر دریائے رائن سے متعلق سمعی و بصری مواد ملاحظہ کریں۔ |
Text is available under the CC BY-SA 4.0 license; additional terms may apply.
Images, videos and audio are available under their respective licenses.
