Foaks
Litje Foaks-Bäidene (Vulpes vulpes)
Systematik
Oardenge: Roowdierte (Carnivora) Uurfamilie: Canoidea Familie: Canidae Sleek: Foakse (Vulpes) Oard: Foaks (Vulpes vulpes)

Die Foaks (Vulpes vulpes) is ne Oard fon Roowdiert. Hie is fier wieded. As Neozoa raakt dät sogoar Foakse in Australien.

Die Körper fon dän Foaks is buute dän Stäit 45,5 bit 90 Zentimetere loange, die Stäit is 30 bit 55,5 Zentimetere loange. Hie wächt 3 bit 14 Kilo: In Noudamerikoa] is ju middelmäitige Sweeregaid fon n Wiefken 4,1 bit 4,5 Kilo un dät fon n Montje 4,5 bit 5,4 Kilo^[1] In Europa wächt n middelmäitigen Foaks 8 bit 10 Kilo^[2]

N Foaks is normoal toun grootsten Deel roodhierich, man dät rakt uk Faawe-Varianten, do me ap Ängelsk "Silverfox" (Ap Seeltersk betjut dät:Säälwerfoaks) un "Crossfox" (Ap Seeltersk betjudt dät:Miskling-Foaks) naamt. N "Silverfox" häd wiete un swotte Hiere, do so bunt truchnunner ferdeeld sunt, dät me toanke kuud, die Foaks waas säälwer-faawich. Die "Crossfox" sjucht so uut as af hie n Miskling uut n roodhierigen Foaks un n "Silverfox" waas. Dät is die Gruund foar sin Noome. Dät raakt uuk ne Variation fon dän "Silverfox", die der min wiete Hiere häd, man moor swotte. Dät is die sonaamde "Swotte Foaks" In Europa is bloot 1 Prozent fon aal Foakse swot, in Amerikoa fuul moor^[3]

• 
  N normoalen roodhierigen Foaks
• 
  Disse Variante naamt me ap Ängelsk "Silverfox"
• 
  Disse Variante naamt me ap Ängelsk "Cross fox"
• 
  N swotten Foaks

N Foaks frät Flaask. Hie fangt Muuse. Grattere Dierte fangt hie bienaist bloot dan, wan se säik sunt, wan se uut n uur Gruund eenfach tou fangen sunt (as inrichelde Huusdierte) of wan hie n n gjucht stäärken Foaks is.

• 
  N Foaks mäd ne Muus
• 
  N Foaks, die der n tom Kanienken fange wol

1. ↑ Ronald M. Nowak: Walker's Mammals of the World Sixth Edition, ISBN 0-8018-5789-9 Düt Bouk is ju Wälle un ferwiest sälwen ap ju Wälle "Ables 1975"
2. ↑ Ronald M. Nowak: Walker's Mammals of the World Sixth Edition, ISBN 0-8018-5789-9 Düt Bouk is ju Wälle un ferwiest sälwen ap ju Wälle "Haltenorth and Roth 1968"
3. ↑ Ronald M. Nowak: Walker's Mammals of the World Sixth Edition, ISBN 0-8018-5789-9 Düt Bouk is ju Wälle un ferwiest sälwen ap ju Wälle "Krott 1992"