Edith Harxhi ka lindur në Tiranë dhe është specialiste në fushën e shkencave politike e të marrëdhënieve ndërkombëtare. Ajo ka studiuar për Shkenca Politike dhe Marrëdhënie Ndërkombëtare në Universitetin e Edinburgut, Britani e Madhe. Më pas, ka kryer vitin e parë të Doktoraturës (Ph.D.) në Universitetin Bilkent të Ankarasë^[1].

Momentalisht ajo është drejtoreshë ekzekutive të organizatës "think tank" të pavarur Albanian Policy Center^[2]. Kjo organizatë është e përqendruar në analizën dhe kërkimet të çështjet ndërkombëtare, politikën e jashtme, qeverisjen shqiptare, sigurinë dhe marrëdhëniet midis vendeve të Evropës Juglindore dhe marrëdhëniet e tyre evropiane dhe transatlantike.

Pas studimeve universitare ajo u zhvendos në Turqi ku punoi si zëvendësambasadore në ambasadën shqiptare në Ankara. Më pas, ajo punoi në Kosovë me Kombet e Bashkuara në çështjet gjinore, ku në partneritet me grupet e grave nga parlamenti dhe shoqëria civile hartoi Ligjin e parë të Barazisë Gjinore të Kosovës^[3]. Edith Harxhi ka luajtur një rol shumë të rëndësishëm në lobimin e pavarësisë së Kosovës. Ajo ka mbajtur funksionin e zëvendësministres së Punëve të Jashme në vitet 2005-2013. Gjithashtu, ajo ka qenë përgjegjëse në marrëdhëniet e diplomacinë ndërkombëtare si dhe në procesin e integrimit të Shqipërisë.

Harxhi është e martuar me një doktor shkencash në genetikë veterinare, Guven Guneren, në vitin 1997 në Ankara, me origjine shqiptare nga qyteti i Manastirit në Republikën e Maqedonisë së Veriut. ^[4] Prej 8 vitesh, ajo jeton në periferi të Tiranës, në fshatin Ibë. ^[5]