Siccomu l'anticu Stemma cìvicu dû cumuni di Aci Sant'Antoniu non avìa lu furmali dicretu cuvernativu di ricanuscimentu, ntô 1983 lu cumuni s'arrivurgìu a lu "Studiu Aràrdicu di cunzulenza ligali Nubbiliari" di Gènuva cu la ntinzioni di fàrisi fari nu stemma cìvicu furmarmenti arricanusciutu. Ma li ndàggini stòrichi svurgiuti di ssu Studiu Aràrdicu di Genuva, foru fatti nta na manera supirficiali e lu stemma ca ni niscìu arrisurtau straneru pâ siculari stòria dâ Terra di Aci, di unni lu tirritoriu di Aci Sant'Antoniu apparteni.
Lu stemma, ca cu dilibirazzioni dû 6 Austu 1984 lu comuni appruvau, porta li sìmmuli di famigghi nubbiliari astrànii ô tirritoriu dâ citati, si non fussi sulu picchì a partiri di la secunna mità dû Seicentu foru feudutari di na parti di li tirritori di Aci.

Ricentimenti lu comuni di Aci Sant'Antoniu, fici la dumanna pi uttèniri lu ricanuscimentu ministeriali di l'anticu sò stemma, ca è chiddu ca nzinu ô 1983 nun avìa lu ricanuscimentu cuvernativu, ma ca era misu nta tutti li ducumenta ufficiali di l'antica "Universitati di Aci" e ca nta l'òpira di Fidericu Gravina, "Supplimentu a lu Blasoni ntâ Sicilia spittanti a li municipi e a li famigghi di l'Italia", si dici ca "lu stemma di Aci Sant'Antoniu è chiddu stissu di Aciriali, accussi comu a chistu sunnu puru li stemmi di Acicasteddu, Aci Bonaccossi, e Acicatina" .

Pi sapìrinni cchiossai, vidi puru la vuci Stemma dê citati dâ Terra di Aci.