Юлиан Рамач (*12. децембер 1940, Руски Керестур, Войводина, Югославия) — языкознатель, професор Новосадской универзиты, вызнамный лексикограф, перекладатель и сполоченскый дѣятель войводинской русинской меншины.^[1]

Закончив гимназию в Новом Садѣ (1959), затым штудировав славянскы языкы на Београдской универзитѣ (1959–1963), де в року 1981 обгаив магистерску дизертацию в тематицѣ русинской лексикы. Розвиваючи материлы той дизертации, в року 1983 написав учебник Лексика руского язика. Еден час преподавав русинскый и русскый языкы на гимназии в Руском Керестурѣ и сполупрацовав в русинской редакции Радия Нови Сад. Быв первым сполупрацовником в програмѣ выучованя русинского языка и литературы на филозофской факултѣ Новосадской универзиты (1972), де по часѣ отворила ся катедра русинского языка и литературы, на котрой выучовав, а еден час и шефовав. В року 1988 зыскав ступень доктора филозофии (1988, тема дизертации Применовнїцки конструкциї у руским литературним язику) и професора (1999). В сучасности е на пензии и жие в Коцурѣ, але продовжать научну роботу.^[2]

Юлиан Рамач выступив тыж як перфектный перекладач на язык войводянскых Русинох (переважно Пушкина, Ершова), а од зачатку 2000-х рокох як активный сполоченскый дѣятель русинскых народностных и културных организаций.^[1]

Юлиан Рамач е автором понад 100 научных робот з русинской лингвистикы. Первы з них появили ся в року 1975. Найважнѣйшы суть: Руска лексика (1983), Фразеологийни сербскогорватско-руски словнїк (1987, сполуавтор), Практична стилистика (1996). ^[3][1] Быв головным редактором и спорядником приготовленых колективом авторох трьох фундаменталных словникох: Сербско-руски словнїк (1995–1997, два томы), Руско-сербски словнїк (2010) и Словнїк руского народного язика (2017, два томы).^[2]

Оцѣнѣня^[2]

Награда Искри култури Културно-просвитного здружѣня Войводины;
Награда Микола М. Кочиш часопису Шветлосц (1986);
Награда Кирил и Методий за розвой русинского языка Карпаторусинского центру, Ню Йорк.

Книгы^[2]

• Рамач Ю.: Лексика руского язика. — Нови Сад: Филозофски факултет, 1983.
• Рамач Ю.: Словнїк лексики Гавриїла Костельника. — Нови Сад: Руске слово, 1991.
• Рамач Ю. (главни редактор): Српско-русински речник. Словнїк сербско-руски. Том І. — Нови Сад: Филозофски факултет, 1995; Том ІІ. — Београд: Завод зa уџбенике и наставна средства, 1997.
• Рамач Ю.: Применовнїцки конструкциї у pyским литературним язику. — Београд: Завод зa уџбенике и наставна средства, 1998.
• Рамач Ю.: Ґраматика руского язика за І, ІІ, ІІІ и ІV класу ґимназиї. — Београд: Завод зa уџбенике и наставна средства, 2001.
• Рамач Ю. (редактор): Руско-сербски словнїк. Русинско-српски речник. — Нови Сад: Филозофски факултет, Завод за културу войводянских Руснацох, 2010.
• Рамач Ю. (редактор): Словнїк руского народного язика. Том І А–Н; Том ІІ О–Я — Нови Сад: Филозофски факултет, Завод за културу войводянских Руснацох, Дружтво за руски язик, литературу и културу, Руске слово, 2017.

• Дуліченко О.: Рамач Юліан //Магочій П.Р., Поп І. (уклад.) Енциклопедія історії та культури карпатських русинів. Вид-во В.Падяка. Ужгород, 2010. ISBN 978-966-387-044-1 укр. С. 627.
• Миронов Г. (Jul. 15th, 2010). «Руска бешеда» балканских русин и её история. (по русскы). ЖЖ. https://podkarpatrus.livejournal.com/619666.html. [перевірено 2019-12-28]. 
• Визначни Руснаци: Др Юлиян Рамач (по русинскы) (ФОТО). Новинарска асоциация Руснацох. май 7, 2018. https://nar.org.rs/rue/др-юлиян-рамач/. [перевірено 2019-12-29]. 

·