Совы (Strigiformes) суть релатівно чісленым рядом класы птахів обсягуюча веце як 200 видів. Совы суть векшынов самостатно жыючі ночны жывотны (хоць єствують і выїмкы, котры ся жывлять малыма ссавцями, хробаками і другыма видами птахів, дакотры ся шпеціалізують вылучно на лов рыб. Нестравительны части жертвы потім вывертають. Находять ся на вшыткых світовых контінентах з вынятком Антарктіды, великой части Ґроньска і дакілько океаньскых островів.

До ряду сов рядиме дві родины: чісленїша і видово розличнїша родина сововы (Strigidae) і менше чісленїша родина сипуховы (Tytonidae).

Совы мають дуже невыразны „масковачі“ фарбы, навысше їх вынятоково мягкы пірка з гребінёвым окраём уможнюють напросто тихе лїтаня. То їм помагать при приближіню к несподїваючій ся жертві, але іщі їм уможнює орьєнтацію слухом, котру бы звычайно чуханя нормалных крыл рушыло. Тым, же мають так пелехате піря, видять ся векшы як досправды суть. Коло оч мають веярёво упорядковане піря - завой. Подобно як хищі мають огнутый дзёбак. Персты суть перероснуты пірём. Четвертый перст годны обернути допереду або дозаду. Саміцї сов суть векшы як самцї, великость є од 12 до 84 цм.

Совы мають на голові піря коло ух так, же напрямують звук до ушной дїркы. Дакотры можуть твар того піря поужытём свалів управляти. Совы чують і ултразвук. Дакотры виды мають єдно ухо высше як друге - дякуючі тому можуть становити позіцію нелем як угол до стороны але і як угол до вышкы.

Совы тыж добрї видять на далеко, а то ай за дуже планых світловых условій. На близко уж так добрї не видять і зато ся, наприклад при порцованю жертвы, рядять за помочі щетковых пірок на краю дзёбака. На розлуку од другых птахів мають око, котре напрямує допереду, перекрыте очным вічком а не спіднїм. Угол виджіня є 160°. Голову можуть обернути аж о 270°.

Їх розмір ся значно одрізнять. Найменшы представителї росту до 13,5 цм а найвекшы можуть выроснути до 60 - 71 цм з роспятём крыл аж 2 метры і вагов 4,5 кґ.

Тоты даны суть часточно або цалком основаны на перекладї статї Sovy на чеській Вікіпедії.

Далшы інформації о темі на проєктах Фонду Вікімедія:

	мултімедіалный обсяг на Вікіскладї
	інформації о таксонї на Віківидах