Седмочисленици суть семеро святы, честованы в Православной Церкви, Грекокатолицкой Церкви и другых церквах яко творцѣ глаголицѣ и кирилицѣ и ширителѣ славянской Божой службы.

Тоты святы суть Кирил и Мефодий – творцѣ глаголицѣ, а тыж их пятеро ученици, котры по смерти Мефодия мусѣли одыйти з Моравии до Булгарии: Климент, Наум, Горазд, Сава и Ангеларий.^[1] До того числа подля церковных канонох не включать ся еще еден ученик Мефодия, Константин Преславскый, понеже не быв канонизованый.

Мефодий умер 6. апрѣля 885 во Велеградѣ, главном городѣ Моравии. Лишив по собѣ наступником Моравана Горазда, и тот быв тогочасным Папом Штефаном V. рукоположеный. Але нѣмецкый бискуп Вихинг з помочов сфалшованого папского письма и огварянь добив ся того, же Папа заказав Гораздови Божу службу в славянском языку.^[2] Формално Вихинг зоставав лем епископом Нѣтры, але од Папы достав функцию управляючого митрополита Великоморавской Церкви, а тыж зыскав повну подпору од Святополка, нового пановника Моравии. Неодовго Горазд и его ученици были выголошены еретиками и увязнены, дакотрых просто забили. Што стало ся дале з Гораздом, не знати. З Жития Св. Климента дознаеме ся лем тото, же увязнены ученици Гораздовы ревно ся молили, и стало ся трясеня землѣ, и оковы им поспадовали. Тото повторяло ся три раз. О том дознав ся народ, котрый и без того быв на сторонѣ византийскых миссионерох, и грозило возстаня. Про то досудили вихинговце, же лѣпше буде просто выгнати увязненых з Моравии,^[3] и ученици на чолѣ з Климентом мусѣли спасати ся от преслѣдованя и одышли до Булгарии, де нашли притулок и поддержку.

З Булгарии пак славянске писменство росширило ся въедно зо славянсков Божов службов и на Киевску Русь.

Праздник седмочисленикох держать 27. юла — в день успѣня Св. Климента Охридского, котрый меджи учениками найвеце познатый. В Римокатолицкой Церкви на тот датум припадать праздник Св. Горазда и сполочникох.^[4]

• ŠKOVIERA, Andrej. Svätí slovanskí sedmopočetníci. 1. vyd. Bratislava : Slovenský komitét slavistov - Slavistický ústav Jána Stanislava SAV, 2010. 247 с. ISBN 978-80-89489-02-2. Доступно on-line.
• KELLY, John N. D. Encyklopedia papieży. Warszawa : Państwowy Instytut Wydawniczy. ISBN 83-06-02633-0.

Вікісклад має мултімедіалны дата на тему:

Седмочисленици

• Велика Моравия
• Кирил и Мефодий
• Святый Мефодий