محمد وحید الدین
محمد چھیواں یاں محمد محیدالدین (جم:14 جنوری 1861ء - موت:16 مئی 1926ء) سلطنت عثمانیہ دا 36واں تے آخری حکمران سی ، جہڑا اپنے بھائی محمد V دے مگروں 1918ء توں 1922ء تک سلطنت عثمانیہ دا سلطان رہیا ۔ اسنوں 4 جولائی 1918ء نوں سلطنت دے بانی عثمان اول دی تلوار نال نواز کے 36ویں سلطان دیاں ذمہ داریاں دتیاں گئیاں ۔ اس دے دور حکومت دا سبتوں وڈا واقعہ جنگ عظیم اول سی جہڑی سلطنت لئی تباہ کن ثابت ہوئی ۔ جنگ چ شکست دے نتیجے چ برطانیہ دیاں فوجاں نے بغداد تے فلسطین اتے مل مار لیا تے سلطنت دا بوہتا علاقہ اتحادی فوجاں دے مل ہیٹھ آ گیا ۔ اپریل 1920ء چ سان ریمو کانفرنس دے نتیجے چ شام اتے فرانس تے فلسطین تے بین النہرین (عراق) اتے برطانیہ دا اختیار تسلیم کر لیا گئیا ۔ 10 اگست 1920ء نوں سلطان دے نمائندےآں نے معاہدہ سیورے اتے دستخط کیتے جسدے نتیجے چ اناطولیہ تے ازمیر سلطنت عثمانیہ دے قبضے توں نکل گئے تے ترکی دا حلقہ اثر ہوڑ سکڑ گیا ، جدوں کہ معاہدے دے نتیجے چ اینہاں نوں حجاز چ آزاد ریاست نوں وی تسلیم کرنا پیا ۔ ترک قوم پرست سلطان ولوں معاہدے نوں تسلیم کرن دے فیصلے اتے سخت ناراض سن تے اینہاں نے 23 اپریل 1920ء نوں انکرہ چ مصطفی کمال اتاترک دی زیر قیادت ترک ملت مجلس عالی دا اعلان کیتا ۔ سلطان محمد ششم نوں تخت توں لاہ دتا گیا تے عارضی آئین نافذ کیتا گیا ۔ قوم پرستاں نے جنگ آزادی چ کامیابی دے مگروں یکم نومبر 1922ء نوں سلطنت عثمانیہ دے خاتمے دا باضابطہ اعلان کیتا تے سلطان نوں ناپسندیدہ شخصیت قرار دیندے ہوئے ملک بدر کر دتا ، جہڑا 17 نومبر نوں برطانوی بحری جہاز راہیں مالٹا چلا گیا تے بعد چ اسنے اپنے جیون دے آخری دیہاڑے اٹلی چ لنگھائے ۔ 19 نومبر 1922ء نوں اسدے قریبی عزیز عبدالمجید آفندی نوں (عبدالمجید II نوں نواں خلیفہ چنیا گیا جہڑا 1924ء ـ خلافت دے خاتمے تک ایہہ ذمہ داری نبھاندا رہیا ۔ محمد ششم دا انتقال 16 مئی 1926ء چ سان ریمو اٹلی چ ہویا تے اسنوں دمشق چ سلیم اول مسیت چ سپرد خاک کیتا گیا ۔
ہور ویکھو
[سودھو]Text is available under the CC BY-SA 4.0 license; additional terms may apply.
Images, videos and audio are available under their respective licenses.
