Burg Grafendahn
Die Dahner Burchegrupp
Entstehungszait:	1287
Burchetyp:	Felseburch
Erhaltungszustann:	Ruin
Bauwais:	Buggelquader
Ort:	Dahn
Geografische Lach	49° 9′ 1″ N, 7° 48′ 9″ O49.1502777777787.8025314Koordinaten: 49° 9′ 1″ N, 7° 48′ 9″ O
Heh:	314 m ü. NHN

Die Burch Grafedåhn leit im siedlische Pälzerwald, em deitsche Däl vum Wasgau, knapp 1 km eschdlich vun de Kläschdadt Dåhn.

Die Felseburch gehert zur Dåhner Burchegrupp, zu der noch die Burche Altdåhn un Tanschdä zehle. Die drei Burche sin zwar net gleichzeitisch, awwer direkt newernonner uff em Berchrigge gebaut wor. E ähnlichi Form Burche zu baue is z. B. aa in de Vogese im owwere Elsass bei de drei Burche vun Hussere zu finne.

Grafedåhn is 1287 vun Konrad vun Mursel gebaut wor, der Lehnsmonn vun de Bischeef vun Speyer un e Enkel vum Friedrich vun Dåhn war. Die Burch war vun Åfang å als Ganerbeburch konzipiert, also fa mehrere Besitzer, die do mit ihrem Hausschdond wohne. Schun 1288 hat's näwerm Konrad Mursel noch fünf weitere Ganerbe gäb, dorunner aa die Grafe vun Sponhoim. Im Johr 1339 hat de Graf Johonn II vun Sponhoim dann vun de onnere Parteie, dorunner Wilhelm vun Winschdä (des war em Konrad Mursel sei Schwiersòhn) sämtliche Ådäle uffkaaf un is domit de änzische Eichentiemer wor. Seitdäm hääst die Burch a "Grafedåhn".

Die Burch is 1425 stärker befestischd wor un donn 1437, wie es Geschlecht vun de Sponhoimer mit'em Dod vum Johonn V. ausgeschdorb is, durch Erbvertrach in de Besitz vun de Markgrafe vun Bade iwwergong. Awwer die Befestischunge hon doch nät gelongt, um enrer Belacherung durch Kurfirschd Friedrich dem Siegreiche zu widerschdehe. 1462 hatter die Burch ingenumm un zerschdert. Sie is dann, wie's schoint, aa nimmi widder uffgebaut wor. 1480 hat de Hons vun Trotha, wo schun die Burch Berwartschdä als Lehe gehatt hat, aa Grafedåhn zum Lehe genumm und 1485 schließlich kaaf. Gemach hatter dro, scheint's, nix – jedenfalls läst ma, dass se um 1500 unbewohnbar gewesst sin soll.

1637 war die Ruin donn im Besitz vun de Herre vun Fleckeschdä. 1642 isse ins Eichentum vun de Schenke vun Waldenburch komm, wo'se rund 150 Johr geblibb is. 1793 is die Ålach on die Lehnsherre zurickgefall, des war domols es Bistum Speyer. Deno is die Burch nimmi nei als Lehe vergäb wor.

Die Burch Grafedåhn is die klänscht vun de drei Burche uffem mittlere vun de fünf Burchfelse. Weil e paar moderne Brüschdungsmaure dezu komm sin, wirkt die Bebauung vun de Owwerburch heit e bissel unklar. Im Weschde vun de Owwerburch gäbt's markonte Reschde vun ännre Schildmauer, wo gä'e die Burch Tanschdä erricht wor is. Däle sin noch in originaler Heh erhall. Sie is aus Buckelquader gebaut wor. On die Schildmauer ware e klänner Palas un onnere Wòhnheiser gebaut.

Vun de Unnerburch, die uf zwä schmale Felsterasse geschdonn hat, sin noch mehrere in de Sondschdäfelse gehaune Kommre, zwä Viehtränke un e Brunneschacht erhall. In äm widder uffgebaute Stallgebäude is seit 1987 es Burchmuseum.

• Stefan Grathoff: Die Dahner Burgen. Alt-Dahn – Grafendahn – Tanstein. Führungsheft 21. Edition Burgen, Schlösser, Altertümer Rheinland Pfalz. Schnell un Steiner, Regensburch 2003. ISBN 3-7954-1461-X
• Walter Herrmann: Auf rotem Fels. Ein Führer zu den schönsten Burgen der Pfalz und des elsässischen Wasgau. DRW-Verl. Weinbrenner, Braun, Karlsruhe 2004, ISBN 3-7650-8286-4
• Elena Rey: Burgenführer Pfalz. Superior, Kaiserslautern 2003, ISBN 3-936216-15-0
• Günter Stein: Burgen und Schlösser in der Pfalz. Ein Handbuch. Weidlich, Frankfurt 1976, ISBN 3-8035-8356-X
• Alexander Thon, Peter Pohlit: Grafendahn. In: Jürgen Keddigkeit (Hrsg.): Pfälzisches Burgenlexikon. Beiträge zur pfälzischen Geschichte Bd. 12/2, Institut fa Pälzischi Geschicht un Volkskund, Lautre 2002, S. 213-223, ISBN 3-927754-48-X
• Alexander Thon (Hrsg.): ...wie eine gebannte, unnahbare Zauberburg. Burgen in der Südpfalz. 2., verb. Aufl. Schnell + Steiner, Regensburg 2005, S. 18-25, ISBN 3-7954-1570-5

• Dåhner Burchegrupp
• Burch Altdåhn
• Burch Tanstein
• Burch Neidåhn
• Jungfernsprung

 Commons: Dahner Burgengruppe — Waitere Mulitimediadataie zum Artikel

• Dåhner Felselond: Altdåhn–Grafedåhn–Tanschdä
• Historische Orte: Burch Grafedåhn