Lo Plan de Canjuers es un plan calcari e arid d'Occitània, en Provença dins lo departament de Var. Lo plan es situat dins lei Preaups de Castelana au Sud dei Gòrgas de Verdon, a 30 km au Nòrd de Draguinhan e a 15 km d'Aups.

Lo plan a una altitud mejana de 800 m; es dividit en doas parts: lo Grand Plan de Canjuers, lòng de 15 km vèrs l'Èst e larg de 10 km, e lo Pichon Plan de Canjuers, lòng de 5 km vèrs lo Nòrd e larg de 2 km.
Lo plan es encerclat de montanhas coma lo Grand Margès (1577 m) au Nòrd que dessepara lo plan dei Gòrgas de Verdon o la montanha de Barjauda (1173 m) au Sud.

Sus lo plan, la vegetacion es escarsa perque lo sòu es fòrça arid, se compausa subretot de garriga. Sa ròca calcària e carstica a creat una monta-davala, compausada d'avencs nombrós coma lo Grand Avenc de Canjuers, l'Avenc de la Noguiera o lo Clòs dei Faions. Es un luòc important d'espeleologia: sota lo plan se tròba un dei pus grands bacins d'aiga sosterranha d'Euròpa.

Lo plan assosta despuèi 1970 lo camp militar de Canjuers, lo camp militar pus vast d'Euròpa (60 km de lòng e 20 km de larg). L'accès au camp es enebit a la populacion.