Henry Laurence Gantt, (1861-1919), èra engenhaire en mecanica e consultant en bailejament. Es subretot conegut per aver mes al punt en 1910 son celèbre diagrama fòrça utilizat en gestion dels projèctes.

Aqueles diagramas de Gantt foguèron utilizats sus de projèctes majors, coma la Restanca Hoover o lo sistèma de las autorotas interestats als Estats Units d'America, e contunhan d'èsser una aisina importanta dins la gestion del projècte^[1].

Gantt nasquèt a Calvert County, al Maryland. Foguèt diplomat de l'Escòla McDonogh en 1878 e estudièt mai tard al Stevens Institute of Technology dins lo New Jersey.

Trabalhèt coma ensenhaire e dessenhaire abans de venir un engenhaire en mecanica. En 1887, jonhèt Frederick Winslow Taylor dins l'aplicacion dels principis de gestion scientifica a lor trabalh a Midvale Steel e Bethlehem Steel - trabalhèt amb Taylor fins a 1893. Dins sa carrièra mai tard coma consultant en bailejament - a la seguida de l'invencion del diagrama de Gantt - tanben concebèt lo sistèma de pagament dels salaris "tascas e bonus" e de metòdes de mesura de l'eficacitat e de la productivitat dels trabalhadors.

En 1916, influenciat per Thorstein Veblen, metèt en plaça la Novèla Maquina (New Machine), una associacion que cercava d'aplicar los critèris d'eficacitat industriala al procèssus politic.

L'American Society of Mechanical Engineers (ASME) balha una medalha annala en onor d'Henry Laurence Gantt^[2].

L'eretatge de Henry Gantt per la gestion de produccion es lo seguent:

• Lo diagrama de Gantt
  Encara considerat uèi coma una aisina de gestion importanta, dona un calendrièr grafic per la planificacion e lo contraròtle de las òbras, e lo registrament de la progression de las estapas d'un projècte. Aqel diagrama a una variacion modèrna, lo malhum PERT .
• L'eficacitat industriala
  Se pòt produire pas que per l'aplicacion de l'analisi scientifica a totes los aspèctes del trabalh en cors. Lo ròtle de gestion industriala es de melhorar lo sistèma en rebutant los accidents.
• Lo sistèma de Trabalh e Bonus
  Liga la prima versada als bailes segon lo biais qu'ensenhan a lors emplegats cossí melhorar las performanças.
• La responsabilitat sociala de las entrepresas
  Crei que las entrepresas an d'obligacions a respècte del ben èsser de la societat ont opèran.

Gantt creèt fòrça tipes de grafics^[3]. Concebèt sos diagramas per tòca que los contramèstres e autres supervisors pòscan rapidament saber se la produccion respècta la planificacion, es en avança o en retard. Los logicials modèrnes de gestion de projècte incluson aquela foncion critica.

Un metòde novèl d'afichatge de las interdependéncias entre los procèssus per aumentar la visibilitat de las planificacions de produccion foguèt inventat en 1896 per Karol Adamiecki, semblabla a aquela definida per Gantt en 1903. Pasmens, Adamiecki publiquèt pas sas òbras dins una lenga populara en Occident. Alara, Gantt foguèt en mesura de popularizar son metòde, desvolopada a l'entorn de l'an 1910-1915. Amb de modificacions menoras, çò que ven de l'organigrama Adamiecki es ara pus comunament nomenat lo «diagrama de Gantt»^[4].

1. ↑ (en)Gantt chart history.
2. ↑ (en)|Medalha Henry Laurence Gantt de l'ASME
3. ↑ (en)Herrmann, Jeffrey W., History of Decision-Making Tools for Production Scheduling, Proceedings of the 2005 Multidisciplinary Conference on Scheduling: Theory and Applications, New York, July 18–21, 2005.
4. ↑ (en)Gerard Blokdijk, Project Management 100 Success Secrets, Lulu.com, 2007, ISBN 0980459907, Google Print, p.76

• (fr)Medalha Henry Laurence Gantt

• Karol Adamiecki
• Ordenançament
• Diagrama de Gantt

Gantt publiquèt divèrses articles e libres; entre eles:

• 1916. Work, Wages, and Profits, second edition, Engineering Magazine Co., New York.
• 1919. Organizing for Work, Harcourt, Brace, and Howe, New York.