Antonio Pettigrew
Antonio Pettigrew | |
Statsborgarskap | USA |
Fødd | 3. november 1967 Macon |
Død | 10. august 2010 (42 år) Chatham County |
Idrett | friidrett |
Tok del i | Sommar-OL 2000 |
Antonio Pettigrew (3. november 1967–10. august 2010) var ein USA-amerikansk friidrettsutøvar som spesialiserte seg på 400 m. Han vart verdsmeister på 400 meter under VM i friidrett 1991 i Tokyo. I same meisterskapen fekk han sølvmedalje på 4x400 meter stafett. Han var fødd i Macon i delstaten Georgia i USA.
Karriere
[endre | endre wikiteksten]Pettigrew vann den USA-amerikanske studentmeisterskapen fire gongar dei åra han gjekk på høgskule i Raleigh i Nord-Carolina. Han deltok på nivå to sidan han ikkje hadde råd å delta på høgste nivå. I 1988 sprang han for fyrste gong under 46 sekundar på 400 m, med 45,36 som bestetid for sesongen. Sesongen etter slo han gjennom og presterte sterke 44,27 under eit stemne i Houston, noko som vart ståande som hans personlege rekord på distansen.
Etter ein mellomsesong i 1990, kom Pettigrew tilbake i 1991 og presterte 44,36 i New York. Han fekk plass på USA sitt 400 meter-lag til VM i friidrett 1991 i Barcelona. Der gjekk han heilt til topps med tida 44,57, fem hundredelar føre briten Roger Black og seks hundredelar framfor sin eigen landsmann, Danny Everett. På den øvsluttande øvinga, 4x400 m stafett, sprang han ankeretappen, men måtte sjå seg slått av Storbritanninas ankermann Kriss Akabusi med 0,04 sekundar.
Pettigrew presterte gode tider både i 1993 og 1994, og gjorde det godt i enkelte internasjonale tevlingar. Sidan trappa han ned satstinga på friidrett, før han kom tilbake på USA sitt stafettlag på 4x400 m under VM i friidrett 1997 i Athen. Her sprang han andreetappen for USA som kom i mål på bestetida 2.56,47. Laget var tildelt gullmedaljane, slik som då USA med Pettigrew på laget vart verdsmeister i same øvinga i 1999, olympiske meistrar i 2000 og atter verdsmeistrar i 2001.
Etter at Pettigrew i mai 2008 innrømma doping gjennom bruk av EPO og veksthormon,[1] vart USA fråteke alle desse sigrane frå 1997-2001, endå om det internasjonale friidrettsforbundet ikkje hadde reglar for i ettertid å gå til eit slikt steg.
10. august 2010 vart Pettigrew funnen død i bilen sin i Chatham County i Nord-Carolina. Obduksjonsrapporten konkluderte med at han døydde av ein overdose difenhydramin. Pettigrew arbeidde som assistenttrenar ved University of North Carolina då han døydde.
Kjelder
[endre | endre wikiteksten]- ↑ «AFP: Olympic relay champion Pettigrew was doping: report», web.archive.org, 20. mai 2011, henta 19. november 2023
- Denne artikkelen bygger på «Antonio Pettigrew» frå Wikipedia på engelsk, den 21. juli 2012.
Bakgrunnsstoff
[endre | endre wikiteksten]- Profil på Sports Reference Arkivert 2010-11-30 ved Wayback Machine.
- «Antonio Pettigrew» (på engelsk). Olympedia.
Text is available under the CC BY-SA 4.0 license; additional terms may apply.
Images, videos and audio are available under their respective licenses.