t Halligers is t Noordfriese dialekt dat spreuken wordt op 'e Duutse Halligen, veural op Hooge en Langeneß.

Hoewel dit dialekt inheems is op 'e eilaanden, wordt t niet bi'j t Eilaand-Noordfries rekend, mar bi'j t Vaastewal-Noordfries, omdat t dialekt nog t meerste verwaant is an t Goesharders. Desondaanks ku'j niet echt zeggen dat t op n aander dialekt liekt: t het inkelde aparte klaankmutaosies had. Dit is nog opmarkeliker a'j bedaenken hoe weinig meensken der op 'e Halligen wonen: de eilaanden hebben bi'j mekeer niet meer as driehonderd inwoners.

Deurdat der zo weinig meensken wonen, is dit dialekt in oonze tied in verval raekt. In zoe'n kleine gemienskop zu'j vandaege de dag meerstal n buteling as moet moeten kiezen, waordeur de tael niet deurgeven wordt. Ok bin der deur t lege tal sprekers zwat gien basisleermiddels en skreven teksten. In de bundel van Noordfriese vertaelings van Theodor Storms Häwelmann komt liekewel ok n Halliger vertaeling veur. Op Langeneß en Hooge bin der piepkleine hiemkundeverienigings die him mit t dialekt bezighoolden; kursussen worden der liekewel niet geven. t Nordfriisk Instituut ziet t Halligers as "akuut mit uutstarven bedreigd".

Dit artikel is skreaven in et stellingwarvsk, in de Algemene Nedersaksiese Schriefwieze.