Нијази Лиманоски
Роден	27 јули 1941 Ростуше, Кралство Југославија
Починал	11 октомври 1997(1997-10-11) (возр. 56)
Националност	Македонец
Народност	Македонец
Занимање	уредник новинар, етнолог, антрополог

Проф. д-р Нијази Лиманоски (27 јули 1941 во Ростуше, Гостиварско, Долна Река, а починал 11 октомври 1997) — етнолог и борец за националното обединување на Македонците без разлика на верската припадност.^[1] Бил доцент на Институтот за географија при Природно-математичкиот факултет во Скопје, основоположник на Културно-научните манифестации на Македонците муслимани и претседател на Здружението на етнолозите на Македонија.

На Географскиот факултет во Скопје дипломирал во 1979 година, а на Филозофскиот факултет во Белград, на Катедрата за етнологија ја одбранил докторската дисертација под наслов: „Етносоцијалните одлики на исламизираните Македонци“. Во февруари 1994 година бил избран за доцент по група предмети на студиите по етнологија на Институтот за географија на Природно-математичкиот факултет во Скопје. Објавил четири книги, како и над 50 научни трудови од областа на етнографијата. Настапил на десет меѓународни симпозиуми. Бил главен и одговорен уредник на списанието Етнолог и на изданијата на Републичката заедница на културно-научните манифестации на Македонците - муслимани. Бил автор на сценарио на ТВ серија од десет емисии на Македонската радио-телевизија под наслов „Етнологијата и фолклорот на исламизираните Македонци“. Бил рецензент на повеќе книги. Бил директор, главен и одговорен уредник и новинар на радиостаницата во Дебар. Во 1974 година преминал на работа како уредник-новинар во Службата за информации на Собранието на Република Македонија, а во 1982 година бил именуван за помошник на претседателот на Републичкиот комитет за образование и физичка култура. Во 1991 година бил именуван за потсекретар во Министерството за образование и физичка култура и на таа должност останал до 1 март 1994 година Бил пратеник на Просветно-културниот собор на Собранието на СР Македонија во периодот од 1969 до 1974 година Бил ангажиран јавен, општествен, културен, научен и политички работник. Бил член на Сојузот на новинарите на Македонија. Основоположник и претседател на Републичката заедница на културно-научните манифестации на Македонците - муслимани (1979). Бил претседател на Здружението на етнолозите на Македонија, член на Друштвото на фолклористите на Македонија, член на Македонското географско друштво, член на меѓународната организација „Караденис - Понт“ од Кишинев (Молдавија) за проучување на етнологијата и фолклорот на Гагаузите во Романија, Молдавија и Украина.

Професионалната кариера ја започнал како новинар преку уредник па сè до директор на Радио Дебар. Во 1974 година преминал да работи како уредник новинар во службата за информации во Собранието на Република Македонија, а во 1982 година бил избран за помошник на претседателот на Републичкиот комитет за образование и физичка култура. Во 1991 година. бил именуван за потсекретар во Министерството за образование и физичка култура.

Од 1994 година е доцент на Заводот за етнологија, Географски институт на ПМФ во Скопје.

Д-р Лиманоски бил ангажиран јавен општествен културен научен и политички работник. Во период од 1969 до 1974 бил пратеник во Просветно-културниот собор на Собранието на СР Македонија. Бил член на Сојузот на новинарите на РМ. Тој е главниот иницијатор основоположник и претседател на Републичката заедница на културно-научните манифестации на Македонците ‒ муслимани во 1979 година.

Бил претседател на Здружението на етнолозите на Македонија период во којшто здружението имаше забележителни активности. Членувал и во други здруженија: Друштво на фолклористи на Македонија Македонско географско друштво член на меѓународното здружение Караденис ‒ Понт од Кишињев Молдавија.

Има објавено четири книги: Исламската религија и исламизираните Македонци, Националниот идентитет на Македонците муслимани, Исламизацијата и етничките промени во Македонија, Одбрана и заштита на мајчиниот македонски јазик и етнос кај исламизираните Македонци, како и над 50 научни трудови.

Добитник е на повеќе награди и признанија, како: Наградата „Климент Охридски“ за посебни остварувања во областа на просветата и културата од интерес на Република Македонија; Наградата „Гоце Делчев“ од областа на науката од интерес на Република Македонија; Наградата „10 Ноември“ на Републичката заедница на научните манифестации на Македонците - муслимани. Одликуван е со Орден на трудот со сребрен венец и со Орден заслуги за народ со сребрени знаци.

• „Исламска религија и исламизираните Македонци“, Лимановски Нијази, Македонска книга, Нова Македонија, година 1989, страница 134.
• „Националниот идентитет на Македонските муслимани“, Лимановски Нијази, Претседателство на Републичката заедница на културно научните манифестации на Македонците муслимани, Нова Македонија. година 1991, страница 29.
• „Исламизација и етнички промени во Македонија“, Лимановски Нијази, Маледонска книга, Нова Македонија, година 1993, страница 432.
• „Десет години на културно научните манифестации на Македонците муслимани“, Лиманоски, Нијази, Дојчиновски, Стојче ; Републичка заедница на културно научните манифестации на Македонците муслимани, Напредок, година 1989, страници 107.
• „Одбрана и заштита на мајчиниот македонски јазик и етнос кај исламизираните Македонци“, Републичка заедница на културно-научните манифестации на Македонците муслимани, Нова Македонија, стр. 296.
• Обичаите кај Македонците муслимани поврзани со раѓањето на детето; Лиманоски, Нијази, Македонски фолклор Год. 24, бр. 48, Институт за фолклор „Марко Цепенков“, Скопје; година 1991, страна 161-173.
• Кумството и побратимството кај Македонците муслимани во Западна Македонија, Нијази Лиманоски, Македонски фолклор, Институт за фолклор „Марко Цепенков“; Скопје, година 1986, страница 147-157.
• „Турско-ориентални елементи во народната песна кај Македонците- Муслимани во СР Македонија“, Лиманоски Нијази, Македонски фолклор Год. 16, бр. 31; Институт за фолклор „Марко Цепенков“; Скопје; година 1983; страница 33-43.
• „Обичаите кај Македонците муслимани поврзани со раѓањето на детето“, Лиманоски Нијази, Македонски фолклор Год. 24, бр. 48, Институт за фолклор „Марко Цепенков“, Скопје; година 1991, страница 161-173.
• „Турско-ориентални елементи во народната песна кај Македонците- Муслимани во СР Македонија“, Нијази Лиманоски,Македонски фолклор, XVI/31, година 1983, страници 33-43;
• „Eтнолошки мотиви и белешки од Голо Брдо“, Нијази Лиманоски, Етнологија, нова серија бр. 1, година 1992, страница 27-36;

• Бранислав Русиќ
• Вера Кличкова
• Ѓорѓи Здравев
• Љупчо Неделков

• Службена мрежна единица на Институтот на етнологија и антрополгија Архивирано на 25 јуни 2020 г.