Бостон (англиски: Boston) — главен град и најнаселена општина на американската држава Масачусетс. Градот се простира на 124 км² и има 685.094 жители (во 2017 година), што го прави најнаселен град во регионот на Нова Англија. Бостон е и седиштето на општината Сафолк, иако владата на општината беше распуштена на 1 јули 1999 година. Градот е стопански и културен центар на значително поголема област позната како Голем Бостон во која живеат околу 4,8 милиони луѓе (во 2016 година) и се рангира како десетта по големина таква област во земјата.

Бостон е еден од најстарите градови во САД, основан на полуостровот Шомут во 1630 година од страна на пуританските доселеници од Англија. Тука се одиграле неколку клучни настани од Американската револуција, како Бостонското крвопролевање, Бостонската чајанка, Битката кај Бункер Хил и Опсадата на Бостон. По независноста на САД од Велика Британија, Бостон продолжил да биде важно пристаниште и индустриски центар, како и центар за образование и култура. Градот се проширил надвор од оригиналниот полуостров преку мелиорација на земјиштето и проширување на општината. Неговата богата историја привлекува многу туристи; само салата Фенел е посетена од повеќе од 20 милиони посетители годишно. Бостон е познат по тоа што во 1634 година е изграден првиот јавен парк, каде што во 1635 година е отворено првото државно училиште и каде што во 1897 година е изградена првата подземна железница.

Во Бостон се наоѓаат многу колеџи и универзитети кои го прават меѓународен центар за високо образование, вклучувајќи ги правото, медицината, инженерството и бизнисот. Бостон се смета и за светки центар во областа на иновациите и претприемништвото, со скоро 2.000 стартапи. Градот е центар за финансиски и деловни услуги како и клучен центар на биотехнологијата и информатичната технологија.

Бостон ја има најголемата стапка на добротворни донации и активности во САД по жител. Бизнисите и институциите се рангираат меѓу најдобрите во земјата за еколошка совесност и реинвестиции. Градот е еден од најскапите за живеење во Соединетите Американски Држави, но, останува високо рангиран по квалитет на живеење.

Во соседниот град Кембриџ се наоѓа познатиот универзитет Харвард и Масачусетскиот технолошки институт.

• „Бостонци“ (англиски: Bostonians) — роман на американскиот писател Хенри Џејмс од 1886 година.
• Бостон (англиски: Boston) — американска рок-група.
• „Бостонски бебиња“ (англиски: Boston babies) - песна на британската панк-рок група G.B.H. од 1982 година.^[1]
• „Бостонци“ (англиски: The Bostonians) — британско-американски филм од 1984 година, во режија на Џејмс Ајвори.^[2]