I Hagay na Akjea dia mpaminany resahina ao amin' ny Baiboly izay anisan' ny olona nanetsiketsika ny fahatongavan-tsain' ny Jiosy taorian' ny Fahababoana mba hanamboatra indray ny Tempoly ao Jerosalema tamin’ ny taona 516 tal. J.K. Tsy dia misy zavatra firy fantatra ny amin' ny tantaran’ i Hagay manokana. Tokony ho iray amin' ny olona nentin’ i Nebokadnezara babo tany Babilôna izy.

Atao hoe חַגַּי / Ḥaggay, izay midika hoe "ny fialan-tsasatro", ny anaran' i Hagay amin' ny teny hebreo.

Nonomboka ny asany tokony ho enina taona taorian' ny fiverenan’ ny Jiosy tao Jodà izy (520 tal. J.K.). Niverina avy tany Babilôna niaraka tamin' i Zerôbabela sy naminany tao Jerosalema tokony ho tamin’ ny taona 521-520 tal. J.K. tamin’ ny nanjakan' i Dariôsy I i Hagay. Nitovitovy fotoana nahavelomana tamin’ i Zakaria sy i Malakia. Satria ny fanamboarana indray ny Tempoly dia nijanona tanatin’ ny valo taona vokatry ny zavatra nataon’ ny Samaritana. Niezaka izy sy i Zakaria namporisika ny vahoaka ka nanaitra azy ireo hifoha amin' ny torimasony, sady nitarika azy ireo mba hanararaotra ny fiovan' ny fitantanan' ny Persiana tamin' ny andron' i Dariôsy I.

Nampahatsiahiviny fa ny Tempoly dia tsy hahamasina vahoaka manao asa tsy madio. Naminany izy fa ho rava ny fanjakana persiana aorian' ny ady an-trano. I Hagay dia heverin' ny maro fa nanoratra ny boky mitondra ny anarany, dia ny Bokin’ i Hagay.

• Mpaminany lehibe: Isaia na Izaia - Jeremia - Ezekiela - Daniela na Daniely

• Mpaminany madinika: Hôsea na Ôsea - Jôela na Jôely - Amôsa na Amôsy - Ôbadia na Abdiasa - Jônà na Jônasa - Mika na Mikea - Nahoma - Habakoka - Zefania na Sôfônia - Hagay na Akjea - Zakaria - Malakia.

• Mpaminanin' i Israely
• Mpaminanin' ny kristianisma