Xavier Bettel
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Xavier Bettel (Stad Luxembörg, 3 miert 1973) waor vaan december 2013 bis november 2023 premier vaan 't Land Luxembörg. Wijer waor Bettel es Luxembörgse polletikus ouch börgemeister vaan Stad Luxembörg (2011-2013) en is heer al parlemintslid sinds 1999. Bettel is lid vaan de liberaole Demokratesch Partei (DP), die op EU-niveau deil oetmaak vaan Renew Europe (same mèt o.a. VVDNL, D66NL, Mouvement RéformateurBE, Open VLDBE en FDPDE).
In 2013 woort Bettel premier vaan Luxembörg. Heer waor d'n opvolger vaan de christendemocraat Jean-Claude Juncker, dee op dat memint President vaan de Europees Kemissie woort.
Bettel is d'n daarde regieringsleier in de wereld dee opelek homoseksueel is, nao premier vaan Iesland Jóhanna Sigurðardóttir (2009-2013) en premier vaan 't Belsj (2011-2014) Elio Di Rupo. In 2015 trouwde heer mèt ziene partner. Heidoor woort heer ouch d'n ierste leier in de Europese Unie dee getrouwd is mèt iemes vaan 'tzelfde geslach. Op dit memint is heer d'n einsegsten homoseksuele leier op eerd same mèt Ana Brnabić, premier vaan Servië.
Op 17 november 2023 woort Luc Frieden, vaan de christendemocratische CSV, de nuie premier vaan Luxembörg.
Text is available under the CC BY-SA 4.0 license; additional terms may apply.
Images, videos and audio are available under their respective licenses.
