Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

Tufsjtèè is 'ne sedimentaire of aafzèttingssjtèè va vulkanisch materiaal, n.l. vulkanische aesje. 't Is 'ne relatief zachte natuursjtèè dae es boewmateriaal gebroekt waoërt. In d'r Eifel wert al saer d'r Romeinse tied tufsjtèè gewonne.

Gemale tufsjtèè neumt me tras. Tras wert ooch al saer d'r Romeinse tied gebroekt öm specie va te make. Dis toevoeging zow de waterdichtheid van 't boewsel garandere.

Travertin wert ooch wal kalktuf geneumd alhoewel de twieë sjtèng op gaans versjillende menere oontsjtande zeunt. De ènnige övverèènkomste zeunt dat 't allebèj aafzèttingssjtèng zeunt en qua uterlek get opèè gelieke. De twieë saoërte sjtèè haant klèng läökskes.

De sjtèèbösjkapel in Voere is geboewd mèt reste van 'ne dao opgegrave Romeinse villa. Tufsjtèè waor èng van de soaërte Romeins boewmateriaal dat hergebroekd waoërt. Op de aafbeelding is de baovesjte laog van de kapel va tufsjtèè.

De sjtaties van d'r Calvariebaerg a g'n Eèkske zeunt ömringt dör 'n boewsel va broene tufsjtèè dae sjtaerk geliekt op d'r tufsjtèè oet Pole dae hiebaove is aafgebeeld.

D'r Tuffau de Lincent of d'r Lincent Tufsjtèè is 'n zachtere, wöllig aa-veulende natuursjtèè, vergeliekbaar mèt d'r mergel van Mestreech.