Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Munstergelaens, es te dit dialek sjpriks.

Karel Houben bekènd es Pater Karel (Munstergelaen, 11 december 1821 - Dublin, 5 januari 1893) waor 'ne pater van de congregatie van de passioniste, dae wèrkde ónder de erm luuj in Ingeland en Ierland. Hae woort in 1988 zalig en in 2007 heilig verklaord.

Karel Houben woort es Johannes Andreas Houben gebore in 'n woonhoes bie 'n watermeule op 'n ziebeek van de Gelaenbeek in Munstergelaen. In 1845 traoj hae ónder de naam Karel van Sint-Andries in bie de passioniste in Ere (Belsj). Hae woort preester gewiejd in 1850. In 1857 woort hae oetgezónde nao 't kloaster Mount Argus in Dublin, woa hae ónder de erm luuj góng wèrke. Hae woort dao erg populair en kreeg de bienaam "de man mèt de gezegende heng". In 1866 woort hae, umdat hae euverwèrk waor, nao Ingeland gesjtuurd. Wie hae weer truukkaom in Dublin in 1874 kaome d'r weer väöl erm en kranke luuj nao häöm toe, woavan d'r väöl zagte dat ze door häöm waore geneze. In 1893 sjtorf pater Karel Houben.

Pater Karel woort zalig verklaord in 1988 door paus Johannes Paulus II. In december 2006 erkènde paus Benedictus XVI dat op veursjpraok van Karel Houben e wónder ies gebeurd. Hae ies op 3 juni 2007 heilig verklaord.

In 't geboortehoes van Karel Houben in Munstergelaen zint twiè kapelle ingeriech, die e baevaartsoord zint. De ièrsjte kapel oet 1935 woort in 1954 te klein, woanao in de sjtal 'n groater kapel woort gemaak. Ouch 't kloaster van Mount Argus in Dublin, woa Karel Houben in de kèrk begrave liek, trèk väöl baevaartgengersj.

De fièsdaag van Karel Houben ies op 5 januari. Op de lètste zóndeg van juni ies d'r 'ne landelike baedaag veur häöm.

• Meertens Instituut (gebruuk es brón veur dit artikel)
• Officieuze Pater Karel website