Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Frans hierevoetbalèltal, bijgenaomp Les Bleus ('de blauwe') is e voetbalteam wat Fraankriek vertrejt op internationaol wèdstrije. 't Weurt gereguleerd door de Féderation française de football (FFF). In juni 2016 steit 't team 17e op de wereldraanklies; 't heet ouch ierste gestande. Fraankriek is e groet voetballand, meh de groetste successe heet 't land rillatief recint behaold.

't Frans voetbalèlftal woort in 1904 geformeerd, roond d'n tied tot de FIFA woort opgeriech. D'n ierste wèdstrijd waor 1 mei dat jaor tegen 't Belsj en indegde in 3-3. De sport kaom mer laankzaam op, umtot 't fietsrenne alle aondach nao ziech touwtrok en ouch de twie soorte rugby geduchte concurrente zouwe weure. Toch deeg 't èlftal mèt aon 't ierste WK voetbal, in Uruguay, boe 't oonder mie wis te winne vaan Mexico. In 1938 organiseerde 't land zelf 't WK.

In de jaore 1950 späölde de ierste gouwe generatie vaan Franse voetballers. 't Land orginaseerde in 1960 ouch 't ierste Europees kampioensjap. Toch góng 't voetbal in 't land achteroet. 't Nationaol èlftal wis ziech dèks neet te plaotse veur EK's en WK's en als ze die wel haolde, kaome ze neet door de grópsfaas. 'n Opleving kaom begin jaore 1980, mèt de wins vaan 't EK in 1984 (op eige bojem) en twie kier de haaf finaol op 't WK vaan 1982 en 1986.

Nao 'ne nuien trökval - op de WK's vaan 1990 en 1994 oontbraoke Les Bleus weer - kaom in 1998 gans oonverwach e groet succes: in eige land woorte ze wereldkampioen. Dit succes heel Fraankriek vas: 't land woort twie jaor later ouch Europees kampioen. Sindsdeen is 't succes wisselend gewees; in 2006 waore ze nog verlerend finalis. Op naovolgende toernoje maakde ze minder indrök. Op 't EK vaan 2016, gehawwe in eige land, woorte ze oonverwach twiede. Dees prestatie kraog e vervolg op 't WK vaan 2018, boe 't land zienen twiede wereldtitel pakde. Nao e minder optrejje op 't EK vaan 2021, boe-in 't team al in de achste finaol woort oetgesjakeld, haolde Fraankriek op 't WK vaan 2022 in Qatar de twiede plaots. Oetindelek waor Argentinië in de finaol te sterk. Groete staar vaan de Franse op dit WK waor Kylian Mbappé. Ouch in de kwalificatie veur 't EK vaan 2024 maakde Fraankriek indrök, zeker wie 't in november 2023 Gibraltar mèt 'nen historische 14-0 versloog.